امیر تحریک لبیک پاکستان حافظ سعد حسین رضوی نے کہا ہے کہ پاکستانی قوم ہر لحاظ سے فلسطین کے ساتھ ہے۔

تفصیلات کے مطابق امیر تحریک لبیک پاکستان حافظ سعد حسین رضوی نے کہا ہے کہ اسرائیلی جارحیت کے خلاف فلسطین کا منہ توڑ جواب عالمی برادری کیلئے واضح پیغام ہے، تمام اسلامی ممالک کھل کر اسرائیل کے خلاف اپنے اقدامات کا اعلان کریں، ہم کبھی بھی ناجائز اسرائیلی صیہونی ریاست کو قبول نہیں کریں گے۔

انہوں نے کہا کہ اسرائیل کی جانب سے فلسطینی عوام پر بڑھتا ہوا ظلم کسی صورت برداشت نہیں کریں گے، آج کے دن مسلم دنیا کی غیرت کا امتحان شروع ہوگیا ہے، پاکستانی قوم اور تحریک لبیک پاکستان کا ہر کارکن فلسطینی عوام کے شانہ بشانہ کھڑا ہے، یہ فلسطینی عوام کا ساتھ دینے کا وقت ہے نہ کہ مذمت کرنے کا۔

ان کا کہنا تھا کہ ایسے حالات میں امت مسلمہ کی خاموشی لمحہ فکریہ ہے، اقوام عالم جنگی حالات میں مظلوم فلسطینیوں کا ساتھ دیں، پاکستانی قوم ہر لحاظ سے فلسطین کے ساتھ ہے، امت مسلمہ کے پاس جہاد کے سوا کوئی آپشن نہیں ہے، پاکستان حکومت اپنے نظریات واضح کرتے ہوئے فلسطین کی مکمل حمایت کرے، قائداعظم نے اسرائیل کو ناجائز ریاست قرار دیا تھا، 57 اسلامی ممالک اتحاد فوری فلسطین کا ساتھ دینے کا اعلان کرے۔

حماس کے اسرائیل پر راکٹ حملوں پر نگران وزیراعظم کا ردعمل

نگران وزیراعظم انوار الحق کاکڑ نے حماس کے اسرائیل پر راکٹ حملوں پر ردعمل دیتے ہوئے کہا کہ فلسطین کے مسئلہ کو فوری حل کرنے کی ضرورت ہے، مشرق وسطیٰ میں بڑھتے ہوئے تشدد سے دل افسردہ ہے، ہم شہریوں کے تحفظ پر زور دیتے ہیں،مشرق وسطیٰ میں پائیدار امن دو ریاستوں کے  حل میں مضمر ہے، جس میں ایک خود مختار ریاست فلسطین ہے جس کے دل میں القدس شریف ہے۔

نگران وزیراعظم نے بڑا اعلان کردیا

نگران وزیراعظم انوار الحق کاکڑ نے مشرق وسطیٰ میں پیدا ہونے والی صورت حال پر افسوس کا اظہار کیا۔

انہوں نے کہا کہ مشرق وسطیٰ میں پنپنے والی پر تشدد صورت حال پر افسردہ ہوں، صورت حال مسئلہ فلسطین کے فوری حل کی متقاضی ہے، ہم شہریوں کی حفاظت اور دونوں اطراف سے تحمل کا مطالبہ کرتے ہیں۔

ان کا کہنا تھا کہ مشرق وسطیٰ کا امن دو ریاستی حل میں پوشیدہ ہے، مشرق وسطیٰ کا حل خودمختار ریاست فلسطین میں مخفی ہے۔

واضح رہے کہ گزشتہ روز فلسطینی عسکریت پسند گروپ حماس کی طرف سے اسرائیل پر 5 ہزار سے زائد راکٹ حملے اور غزہ کی پٹی سے اچانک زمینی حملوں کے بعد اسرائیل نے حالتِ جنگ کا اعلان کردیا تھا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں