صدر مملکت ڈاکٹر عارف علوی نے کہا ہے کہ متحد اور جمہوریت پسند وژن ہم سب کیلئے مشعل راہ ہے۔

تفصیلات کے مطابق صدر مملکت ڈاکٹر عارف علوی نے قائد ملت لیاقت علی خان کی 72 ویں برسی کے موقع پر پیغام جاری کرتے ہوئے کہا کہ ہم قائد ملت لیاقت علی خان کو ان کی برسی کے موقع پر قوم کے لیے ان کی بے پناہ خدمات پر زبردست خراج عقیدت پیش کرتے ہیں، یہ دن ہمیں پاکستان کی آزادی اور اس کے عوام کی فلاح و بہبود کے لیے ان کے غیر متزلزل عزم کی یاد دلاتا ہے۔

انہوں نے کہا کہ لیاقت علی خان جدوجہد آزادی کے دوران بانی پاکستان قائدِ اعظم محمد علی جناح کے شانہ بشانہ کھڑے رہے اور قوم کی تقدیر بدلنے میں اہم کردار ادا کیا۔

 ڈاکٹر عارف علوی کا کہنا تھا کہ لیاقت علی خان نے پاکستان کے پہلے وزیر اعظم کے طور پر خدمات انجام دیں، وہ ملک کی خودمختاری کے بڑے چیمپیئن اور اپنے شہریوں کی فلاح و بہبود کے زبردست حامی تھے،  انہوں نے پاکستان کے ابتدائی سالوں، قرارداد مقاصد اپنانے اور چیلنجز پر قابو پانے کیلئے نوزائیدہ قوم کی رہنمائی میں اہم کردار ادا کیا، قائداعظم کے وژن کے مطابق ایک ترقی پسند اور خوشحال پاکستان کے حصول کے لیے انہوں نے نئی قائم ہونے والی ریاست کی بنیادوں کو مضبوط کرنے کے لیے انتھک محنت کی۔

انہوں نے کہا کہ لیاقت علی خان نے جمہوریت، قانون کی حکمرانی، مہاجرین کی آباد کاری اور بحالی، ملک کے دفاع کو مضبوط بنانے اور سماجی اور معاشی انصاف کے فروغ کے لیے کام کیا،  قوم کے ساتھ ان کی وابستگی نے قوم کے اجتماعی شعور پر لازوال نشان چھوڑا ہے،ایک متحد، جمہوری اور ترقی پسند پاکستان کا ان کا وژن ہم سب کیلئے مشعل راہ ہے۔

صدر مملکت ڈاکٹر عارف علوی نے مزید کہا کہ آج جب ہم ان کی برسی منا رہے ہیں تو آئیے نہ صرف لیاقت علی خان کی قربانیوں اور خدمات کو یاد کریں بلکہ ایک ایسے پاکستان کی تعمیر کے لیے اپنے عزم کا اعادہ کریں جہاں انصاف، مساوات اور اتحاد ہو،  آئیے قائد ملت لیاقت علی خان کو خراج عقیدت پیش کرتے ہوئے ایک بہتر اور خوشحال پاکستان کے لیے کام کریں، اللہ تعالیٰ ان کو جنت الفردوس میں اعلیٰ مقام عطا فرمائے اور ان کے نظریات آنے والی نسلوں تک ہماری رہنمائی کرتے رہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں