وزیراعظم کی معاون خصوصی برائے انسانی حقوق و ترقی نسواں مشعال ملک نے کہا ہے کہ عالمی طاقتیں دہشتگرد بھارتی ریاست کے خلاف سخت اقدامات کریں۔

 تفصیلات کے مطابق وزیراعظم کی معاون خصوصی برائے انسانی حقوق و ترقی نسواں مشعال ملک نے فرینڈز آف کشمیر انٹرنیشنل اور کشمیر میڈیا سروس کے زیراہتمام ’’بھارت میں اقلیتوں پر جبر اور کشمیر میں مظالم‘‘ کے عنوان سے منعقدہ سیمینار سے خطاب کرتے ہوئے کہا کہ ہندوستان میں اقلیتیں آر ایس ایس کے زیر اثر نریندر مودی کی حکومت میں اپنی زندگی کی حفاظت اور مذہب کے حوالے سے مسلسل خوف میں زندگی گزارنے پر مجبور ہیں، بالادست ہندوتوا حکومت ریاستی پالیسی کے طور پر اقلیتوں کی نسل کشی، ان کے مذہبی مقامات مسمار کرنے اور ان کی بے حرمتی کا ارتکاب کر رہی ہے، بھارتی ریاست عالمی امن کے لیے خطرہ بن چکی ہے، عالمی طاقتیں دہشت گرد بھارتی ریاست کے خلاف سخت اقدامات کریں۔

مشعال ملک نے کہا کہ بھارتی بدنام زمانہ حکومت گزشتہ سات دہائیوں سے دہشت گردی جاری رکھے ہوئے ہے تاہم 2014 کے بعد سے اس میں خطرناک حد تک اضافہ دیکھنے میں آیا۔

 انہوں نے کہا کہ ہندوستانی حکومت نےاکثریت پسندی یعنی ہندو راشٹرا کی سیاست کے سہارے اقلیتوں کے ساتھ غیر انسانی امتیازی سلوک روا رکھا ہے، جب سے مودی حکومت اقتدار میں آئی ہے، آر ایس ایس کے انتہا پسندوں کے ذریعہ مساجد، گرجا گھروں اور مندروں پر حملوں میں بے پناہ اضافہ ہوا ہے۔

ان کا کہنا تھا کہ فاشسٹ بھارتی حکومت امتیازی قوانین اور میڈیا پروپیگنڈا مہم کی مدد سے اقلیتوں کو کم تر انسان ظاہر کرنے کی کوشش میں لگی ہوئی ہے، ہندوتوا نظریات اقلیتوں کی شناخت ، تاریخ ، خصوصاً عبادت گاہوں کو ختم کرنے پر تلے ہوئے ہیں، بابری مسجد کو شہید کرنے کے لیے استعمال کیے جانے والے حربے اور طریقے ہندوتوا شرپسندوں کے لیے ایک ترجیحی ماڈل بن چکے ہیں، ان حربوں اور طریقوں کو دوسری مساجد کو نشانہ بنانے کے لیے بار بار استعمال کیا گیا۔

مشعال ملک نے انکشاف کیا کہ 2021 میں بھارت میں مسلمانوں، مسیحیوں اور سکھوں کے خلاف نفرت پر مبنی جرائم کے کل 294 واقعات رپورٹ ہوئے، بھارت بھر میں درجنوں تاریخی مساجد ہندو شرپسندوں کے حملوں کی زد میں آئیں، 1600 سے زائد مساجد کے خلاف میڈیا میں مہم چلائی جا رہی ہے جبکہ منی پور میں سینکڑوں گرجا گھروں کو نذر آتش کیاگیا۔

وزیراعظم کی معاون خصوصی برائے انسانی حقوق و ترقی نسواں مشعال ملک نے کہا کہ اقلیتوں کے خلاف ہندوؤں کو متحرک کرنے کیلئے آر ایس ایس اقلیتوں کے خلاف نفرت پھیلانے کا حربہ استعمال کر رہی ہے تاکہ ہندو بالادستی کا قیام عمل میں لایا جا سکے، مسلم اور مسیحی آبادی کو بد نام کرنا بھارت کا سیاسی ایجنڈا ہے۔

انہوں نے کہا کہ بھارت میں مسیحیوں کے خلاف ہر سال مذہبی اور سیاسی بنیاد پر 100 کے قریب تشدد کے واقعات پیش آتے ہیں۔

مشعال ملک نے خدشہ ظاہر کیا کہ بھارتی حکومت 24,496 مذہبی مقامات کو جبری طور پر اپنے کنٹرول میں لے چکی ہے، یہ انتہائی افسوسناک ہے کہ ہندوستانی عدلیہ اقلیتوں کی نسل کشی اور تشدد کے مرتکب افراد کو ریلیف دے کر ان کے جرم میں برابر کی شریک ہے۔

 انہوں نے کہا کہ سکھوں کو ہندوستان میں مذہبی امتیاز، ظلم و ستم، مقدس مقامات کی بے حرمتی اور قتل عام کا سامنا ہے جبکہ ہندوستانی بدنام زمانہ دہشت گرد نیٹ ورک تمام براعظموں تک پھیل گیا ہے، اس بات کا پتہ کینیڈا میں سکھ رہنما کے قتل اور امریکہ میں ایک اور سکھ رہنما کے قتل کی ناکام سازش سے لگایا جا سکتا ہے۔

وزیراعظم کی معاون خصوصی برائے انسانی حقوق و ترقی نسواں مشعال ملک نے مطالبہ کیا کہ عالمی برادری ہندوستان سے مطالبہ کرے کہ وہ “شہری اور سیاسی حقوق کے بین الاقوامی معاہدے” کا فریق ہونے کے ناطے انسانی حقوق کے اپنے وعدوں کو برقرار رکھے۔

انہوں نے اس بات پر زور دیا کہ اقوام متحدہ اپنی ذمہ داریاں پورے کرتے ہوئے ہندوستانی حکومت کو اقوام متحدہ کے اعلانات کا احترام اور بھارت میں اقلیتوں کے قومی ، نسلی، ثقافتی، مذہبی اور لسانی تشخص کے تحفظ پر عملدرآمد یقینی بنانے پر مجبور کرے۔

مشعال ملک نے خبردار کیا کہ بھارتی ریاست عالمی امن کے لیے خطرہ بن چکی ہے۔

وزیراعظم کی معاون خصوصی برائے انسانی حقوق و ترقی نسواں مشعال ملک نے نے کہا کہ عالمی طاقتیں دہشت گرد بھارتی ریاست کے خلاف سخت اقدامات کریں تاکہ نہ صرف اقلیتوں کو بھارتی ریاستی دہشت گردی سے بچایا جا سکے بلکہ تنازعہ کشمیر کے مستقل حل کو یقینی بنایا جا سکے۔