سابق وزیرخزانہ اسحاق ڈار نے کہا ہے کہ عام انتخابات کے بعد ملکی معیشت کی بحالی ممکن ہو جائے گی۔

تفصیلات کے مطابق سابق وزیرخزانہ اسحاق ڈار سے امریکی سفیر ڈونلڈ بلوم کی ملاقات ہوئی جس میں پاک امریکہ تعلقات اور باہمی دلچسپی کے دیگر امور پر گفتگو ہوئی۔

اسحاق ڈار نے پاک امریکہ جاری اقتصادی اور تجارتی تعاون کو مزید مستحکم کرنے پر زور دیتے ہوئے کہا کہ امریکہ پاکستان کا سب سے بڑا تجارتی شراکت دار ہے۔

ملاقات میں خطے کے امن کے لیے پاکستان کی انتھک کوششوں پر بات چیت کی گئی اور غیر قانونی غیر ملکیوں کی پاکستان سے واپسی کے معاملے پر گفتگو ہوئی۔

امریکی سفیر ڈونلڈ بلوم نے کہا کہ غیر قانونی غیر رجسٹرڈ تارکین وطن بشمول افغان باشندوں کو واپس بھجوانا خود مختار ملک کے طور پر پاکستان کا حق ہے، غیر قانونی تارکین وطن سے قانون کے مطابق نمٹنا اور اپنی سرحدوں کو محفوظ بنانا پاکستان کا حق ہے۔

اس موقع پر امریکی سفیر ڈونلڈ بلوم اور سابق وزیرخزانہ اسحاق ڈار کے درمیان آئی ایم ایف پروگرام پر بھی بات چیت ہوئی۔

سابق وزیرخزانہ اسحاق ڈار نے کہا کہ امید ہے آئی ایم ایف پروگرام کا دوسرا جائزہ کامیابی سے مکمل ہوگا، پر اعتماد ہوں کہ آئندہ عام انتخابات کے بعد ملکی معیشت کی بحالی ممکن ہو جائے گی، امید ہے عام انتخابات شفاف ہوں گے اور تمام سیاسی جماعتوں کو لیول پلیئنگ فیلڈ میسر ہوگا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں