استحکام پاکستان پارٹی کے سربراہ جہانگیر ترین نے کہا ہے کہ ہم ایک مستحکم اور پائیدار پاکستان کی بنیاد رکھیں گے۔

یوم اقبال کے موقع پر جہانگیر ترین نے اپنے جاری کردہ پیغام میں کہا کہ آج ہم شاعر مشرق علامہ اقبال کو خراج عقیدت پیش کرتے ہیں۔

انہوں نے کہا کہ علامہ اقبال کے نظریات، اقدار اور نئی سوچ نے کئی نسلوں کو متاثر کیا، ان کا خواب قائد اعظم کی متحرک قیادت میں شرمندہ تعبیر ہوا۔

انکا کہنا تھا کہ علامہ اقبال کا خودی کا تصور ملک کو ترقی دینے کے لئے مشعل راہ ہے، انہوں نے امت کے نوجوانوں کو شاہین سے تعبیر دی۔

جہانگیر ترین نے مزید کہا کہ ہم ایک مستحکم اور پائیدار پاکستان کی بنیاد رکھیں گے، ایسا پاکستان بنائیں گے جسکا خواب ہمارے بزرگوں نے دیکھا۔

اس سے قبل نگران وزیراعظم انوار الحق کاکڑ اور صدر مملکت ڈاکٹر عارف علوی کی جانب سے بھی شاعر مشرق اور عظیم مفکر ڈاکٹر علامہ محمد اقبال کو ان کے 146ویں یوم پیدائش پر شاندار خراج عقیدت پیش کیا گیا تھا۔

واضح رہے کہ شاعر مشرق اور عظیم مفکر ڈاکٹر علامہ محمد اقبال کا 146 واں یوم پیدائش آج منایا جا رہا ہے، جس کے پیش نظر مزار اقبال پر گارڈز کی تبدیلی کی پروقار تقریب کا انعقاد بھی کیا گیا ہے۔

مفکرِ پاکستان ڈاکٹرعلامہ محمد اقبال کے یومِ ولادت کے موقع پر مزارِ اقبال پر پرُوقار تبدیلی گارڈ کی تقریب منعقد ہوئی جہاں پاک بحریہ کے چاق و چوبند دستے نے اعزازی گارڈ کے فرائض سنبھالے جبکہ پاکستان نیوی کے اسٹیشن کمانڈر لاہور کموڈور ساجد حسین تقریب کے مہمان خصوصی تھے۔

گارڈز کی تعیناتی کے بعد قومی شاعر کے مزار پر گورنر پنجاب محمد بلیغ الرحمان، امیرالبحر ایڈمرل نوید اشرف، پاک بحریہ کے افسران، سیلرز اور نیوی سویلینز کی جانب سے پھولوں کی چادر چڑھائی گئی۔

بعدازاں پاک فضائیہ کے شعبہ تعلقات عامہ نے علامہ محمد اقبال کے 146ویں یوم پیدائش کی مناسبت سے ایک مختصر دستاویزی ویڈیو کا اجراء کیا جس میں شاعر مشرق کو خراج عقیدت پیش کیا گیا۔

دستاویزی فلم میں اس عہد کی تجدید کی گئی ہے کہ پاک فضائیہ کا ہر شاہین مادر وطن کی حفاظت کے لئے ہمہ وقت تیار ہے، قربانی سے گریز نہیں کرے گا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں