کراچی میں راشد منہاس روڈ پر واقع آر جے شاپنگ مال سانحے کی تحقیقات میں بڑی پیشرفت سامنے آئی ہے۔

تفصیلات کے مطابق کراچی میں راشد منہاس روڈ پر واقع آر جے شاپنگ مال میں لگنے والی آگ کے واقعے پر پولیس نے حادثے کے ذمہ دار 5 اہم افراد کو حراست میں لے لیا۔

زیر حراست افراد میں سافٹ ویئر ہاؤس کے مالک عمران عدنان، مال کے سیکیورٹی انچارج عابد شاہ، انتظامیہ کے سلطان اور فیضان شامل ہیں۔

پولیس کے مطابق آگ لگنے کی وجوہات اور ابتدائی تفتیش میں بڑے انکشاف سامنے آئے ہیں، تاہم زیرحراست افراد کو باقاعدہ گرفتار کیا جائے گا۔

پولیس ذرائع کا کہنا تھا کہ چوتھی منزل  پر کال سینٹر اور سافٹ ویئر ہاؤس موجود تھا، بلڈنگ میں قواعد و ضوابط کی دھجیاں اڑائی گئیں۔

واضح رہے کہ 24 نومبر کو کراچی میں راشد منہاس روڈ پر شاپنگ مال میں آتشزدگی سے 11 افراد جاں بحق اور 6 زخمی ہوگئے تھے، جبکہ 40 سے زائد افراد کو فائر بریگیڈ اور امدادی اداروں نے ریسکیو کیا۔

فائر ریسکیو کمانڈر  ہمایوں خان نے بتایا تھا کہ عمارت میں آگ ممکنہ طورپر شارٹ سرکٹ کی وجہ سے لگی، شاپنگ سینٹر میں آگ بجھانے کا نظام موجود نہیں تھا، سینٹرلی ایئرکنڈیشنڈ ہونے کے باعث ہوا کے اخراج کا راستہ نہیں تھا۔