لاہور: نگران وزیر اطلاعات و نشریات مرتضیٰ سولنگی نے کہا ہے کہ بہتر ہوگا صدر مملکت کسی ایک جماعت کے ترجمان نہ بنیں۔

نگران وفاقی وزیر مرتضیٰ سولنگی نے لاہور میں میڈیا سے گفتگو کرتے ہوئے کہا کہ صدر کے خط کا جواب خط سے دیا جائے گا، صدر مملکت پورے ملک کے صدر ہیں، وہ کسی جماعت کے صدر نہیں ہیں، ہماری ان سے گزارش ہے کہ وہ اپنے آئینی عہدے کی تعظیم کا خیال رکھیں، بہتر ہوگا کہ صدر کسی ایک جماعت کے ترجمان بننے کی بجائے سب کے ترجمان بنیں، ہماری خواہش ہے کہ صدر مملکت کی تعظیم برقرار رہے، نوجوان اس ملک کا اثاثہ ہیں

انہوں نے کہا کہ مہنگی بجلی کا عوام پر بوجھ پڑتا ہے، متبادل توانائی کا ہماری ضرورت میں حصہ بہت کم ہے، ہمیں سورج کی روشنی سے فائدہ اٹھانا چاہیے۔

مرتضیٰ سولنگی نے کہا کہ توانائی کے متبادل ذرائع سے بجلی کے حصول پر توجہ دی جا رہی ہے، دنیا موسمیاتی تبدیلی کے دور سے گزر رہی ہے۔

انکا کہنا تھا کہ 8 فروری کو انتخابات ہوں گے، اگلی پارلیمان اور آئندہ حکومتوں کے لئے ضروری ہے کہ وہ اس پالیسی کو جاری رکھیں اور توانائی کے متبادل ذرائع پر توجہ دیں۔

نگران وفاقی وزیر نے کہا کہ متبادل توانائی کے حوالے سے چین دنیا کے اہم ممالک میں شامل ہے، توانائی کے شعبے میں چین نے بھرپور تعاون کیا، مذاکرات اور تحفظات جمہوریت کا حسن ہیں، شکایت کرنا ہر ایک کا حق ہے، شکایات کو سامنے بھی آنا چاہیے۔

مرتضیٰ سولنگی نے مزید کہا کہ نگران حکومت آئین اور قانون کے تحت الیکشن کمیشن کی اعانت کرے گی، الیکشن کمیشن کی موجودہ قیادت ذمہ دار اور قابل لوگوں پر مشتمل ہے، الیکشن کمیشن اپنے دیئے گئے نظام الاوقات پر عمل کر رہا ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج  https://www.facebook.com/BOLUrduNews/ کولائک کریں۔

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔