اسلام آباد: سینیٹ میں فوجی عدالتوں کے حق میں منظور شدہ قرارداد کے خلاف کئی ارکان میدان میں آ گئے اور قرارداد کو واپس لینے کا مطالبہ کردیا۔

تفصیلات کے مطابق ڈپٹی چیئرمین مرزا محمد آفریدی کی زیر صدارت سینیٹ کا اجلاس آج پارلیمنٹ ہاؤس اسلام آباد میں منعقد ہوا جس میں ایوان بالا کے ارکان کی جانب سے فوجی عدالتوں کے حق میں منظور شدہ قرارداد واپس لینے کا مطالبہ کیا گیا۔

اجلاس شروع ہوتے ہی جماعت اسلامی کے سینیٹر مشتاق احمد اور پاکستان پیپلز پارٹی (پی پی پی) کے رضا ربانی سمیت کئی ارکان سیٹوں پر کھڑے ہوگئے جبکہ مسلم لیگ (ن) کی رکن سعدیہ عباسی بھی ہمنوا بن گئیں۔

سینیٹ میں سینیٹر سعدیہ عباسی نے کہا کہ کل سینیٹ نے قرارداد پاس کی جب صرف 12 ارکان ایوان میں موجود تھے، ایجنڈا میں جو چیز شامل نہیں تھی اسے پیش کیا گیا، یہ قرارداد جمہورئت کی نفی ہے، جمہوریت پر شب خون مارا گیا۔

انکا کہنا تھا کہ ایوان نے قوائد وضوابط سے ہٹ کر جو کام کیا ہم اسے سپورٹ نہیں کرتے، ایوان کو استعمال کرکے ایسے قرارداد پاس کرائی گئی جو جمہوریت کی نفی ہے۔

سعدیہ عباسی نے مزید کہا کہ کیا ایوان کل یہ قرارداد لے آئے گا کہ ملک میں مارشل لاء لگا دیا جائے تو کیا مارشل لاء لگا دیا جائے گا؟ یہ طریقہ کار نفی کرتا ہے پارلیمانی روایت کی، موجودہ حالات میں ایسی قرارداد سے جمہوریت مضبوط ہو رہی ہے، یہ قرارداد واپس لیں، یہ قرارداد اس ایوان کی عکاس نہیں ہے۔

دوسری جانب سینیٹر رضا ربانی، طاہر بزنجو، تاج حیدر، سینیٹر مشتاق نے بھی نشتوں پر کھڑے ہو کر احتجاج کیا اور کہا کہ ہم اس معاملے پر بات کرنا چاہتے ہیں، جس پر ڈپٹی چیئرمین مرزا آفریدی نے کہا کہ سینیٹ ایجنڈا مکمل کرکے میں آپ کو بات کرنے کی اجازت دیتا یوں۔

بعدازاں پاکستان تحریک انصاف (پی ٹی آئی) کے سیف اللہ ابڑو نے کورم کی کمی کی نشاندہی کردی اور اراکین کی تعداد پوری نہ ہونے پر ڈپٹی چیئرمین نے اجلاس جمعہ کی صبح ساڑھے دس بجے تک ملتوی کر دیا۔

یاد رہے کہ گزشتہ روز سینیٹ اجلاس میں رواں برس 9 مئی کو پاکستان تحریک انصاف (پی ٹی آئی) کے چیئرمین کی گرفتاری کے بعد ہونے والے واقعات کا ٹرائل فوجی عدالتوں میں کرانے کے حق میں قرارداد منظور کرلی گئی تھی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں