آزاد کشمیر سے اب تک غیر ملکی غیر قانونی افراد کا انخلاء مکمل نہ ہو سکا۔

سیکیورٹی ذرائع کے مطابق 1850 آزاد کشمیر میں مقیم افراد رضا کارانہ طور پر اپنے ملک واپس چلے گئے، 1366 غیر قانونی طور پر مقیم افراد رضا کارانہ طور پر واپس چلے گئے، 484 رجسٹرڈ افراد بھی واپس روانہ ہو گئے ہیں مگر 979 افراد ابھی تک آزاد کشمیر میں مقیم ہیں۔

ذرائع کے مطابق آزاد کشمیر میں رجسٹرڈ غیر ملکی دس ہزار دو سو تئیس افراد مقیم ہیں، مظفرآباد ڈویژن میں 364، پونچھ ڈویژن سے 237، میرپور سے 763 غیر قانونی طور پر مقیم افراد واپس روانہ ہو گئے جبکہ میرپور میں 591 جبکہ پونچھ میں 388 افراد غیر قانونی طور پر ابھی بھی مقیم ہیں۔

سیکیورٹی ذرائع کے مطابق مظفرآباد سے 110، پونچھ سے 81، میرپور سے 293 رجسٹرڈ افراد بھی واپس روانہ ہو گئے جبکہ میرپور میں 591، پونچھ میں 388 افراد غیر قانونی طور پر ابھی بھی مقیم ہیں۔

ایس ایس پی یاسین بیگ کا کہنا تھا کہ مظفرآباد ڈویژن میں غیر قانونی طور پر کوئی غیر ملکی شہری باقی نہیں رہا، تھانوں میں خصوصی ڈیسک قائم کر رکھے ہیں، رجسٹرڈ افراد کی چھان بین بھی کر رہے ہیں، اگر کوئی غیر قانونی مقیم یہاں پر ہو گا اسکے خلاف قانونی کارروائی کی جائے گی۔

واضح رہے کہ غیر قانونی طور پر مقیم افراد کے پاکستان چھوڑنے کی ڈیڈ لائن ختم ہو چکی ہے، جس کے بعد اب حکومت پاکستان نے ان کی بےدخلی کیلئے ملک گیر آپریشن شروع کردیا ہے۔

وزارت داخلہ نے ملکی تاریخ میں پہلی بار فارن ایکٹ 1946 کے تحت تمام صوبوں کو غیر قانونی طور پر مقیم افراد کی بے دخلی کا حکم نامہ جاری کردیا ہے۔

حکم نامے کے مطابق معمولی جرائم میں زیر تفتیش اور سزا یافتہ غیرقانونی طور پر مقیم غیر ملکیوں کو بے دخل کردیا جائے گا۔

نگران حکومت نے خبردار کیا ہے کہ اگر ڈیڈ لائن گزرنے کے بعد کوئی پاکستانی غیرقانونی تارکین وطن کو پناہ دینے میں ملوث پایا گیا تو سخت قانونی کارروائی کی جائے گی، بےدخلی کے منصوبے کا اطلاق پاکستان میں غیر قانونی طور پر مقیم تمام غیر ملکیوں پر ہو گا، منصوبے کے اطلاق میں کسی بھی ملک یا شہریت کو ملحوظ خاطر نہیں رکھا جائے گا۔

سیکیورٹی فورسز نے میپنگ اور جیو فینسنگ کر کے غیر قانونی طور پر مقیم افغان باشندوں کی نشاندہی کا عمل مکمل کرلیا ہے۔

سندھ میں مقیم 2 لاکھ غیر قانونی تارکین وطن کی نشاندہی کا عمل مکمل کیا جا چکا ہے جبکہ خیبرپختونخوا میں بھی مقیم 3 لاکھ غیر قانونی طور پر مقیم افغان شہریوں میں سے رضاکارانہ طور پر واپس نہ جانے والوں کو ہولڈنگ سینٹروں میں منتقل کیا جائے گا۔

اس کے علاوہ اسلام آباد، پنجاب اور بلوچستان میں بھی غیر قانونی طور پر مقیم افغان باشندوں کی بے دخلی کیلئے آپریشن کا آغاز کردیا گیا ہے اور ان کا ڈیٹا اسکیننگ سے چیک کیا جا رہا ہے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں