ایم کیو ایم رہنما مصطفیٰ کمال نے کہا ہے کہ موقع ملا تو 6 ماہ میں کراچی ٹھیک کردیں گے۔

 تفصیلات کے مطابق ایم کیو ایم رہنما مصطفیٰ کمال نے اپنے ایک بیان میں کہا کہ کراچی کا شمار آج دنیا کے چار بدترین شہروں میں ہوتا ہے، اگر ہمیں موقع دیا جائے گا تو شہر چھ ماہ میں ٹھیک ہو جائے گا، دنیا میں 25 بڑی کمپنیز سی ای او انڈین ہیں، ہماری جامعات بے روزگاری کی فیکٹریاں بن گئی ہیں، ہم نوکری تلاش کرنے والا نوجوان بنا رہے ہیں نوکری دینے والا نہیں، نوجوانوں کو اعلیٰ تعلیم دلوانے سے متعلق اقدامات اٹھانے کی ضرورت ہے۔

انہوں نے کہا کہ 15 سالوں میں اس شہر کو ایک قطرہ پانی نہیں ملا، غیر قانونی ہائیڈرنٹس بنا کر ہمیں ہمارا پانی بیچا جا رہا ہے، ایم کیو ایم اس شہر کی بہتری کے لیے کام کرنا چاہتی ہے۔

ان کا کہنا تھا کہ ہمیں نے بہت جنازے اٹھا لیے ماؤں کے بچوں کا احساس ہے، 700 ماؤں کے لاپتہ بچے ہم نے بازیاب کروائے ہیں۔

مصطفیٰ کمال نے کہا کہ نواز شریف صاحب سے نہیں ملتے تو اور کیا کرتے آپشن کیا ہے؟ پی ٹی آئی کا کچھ پتہ نہیں اور پیپلزپارٹی 15 سالوں میں مسائل حل کرنے میں ناکام ہوگئی۔

انہوں نے کہا کہ ہم نے درست مردم شماری کروانے کے لیے وزیراعظم اور وفاقی وزراء سے ملاقاتیں کیں، ہم اس قوم کے مستقبل کو سنوارنا چاہتے ہیں، 5 لوگوں کے پاس پاکستان کے اختیارات ہیں، ایک وزیراعظم اور چار وزرائے اعلیٰ کے پاس پورے ملک کے اختیارات ہیں،1400 ارب روپے وزیر اعلیٰ کو ملتے ہیں جو نچلی سطح تک نہیں پہنچتے ہیں، ہمیں اگر اس ملک میں روایتی سیاست کرنی ہوتی تو ہم جدوجہد کرنا چھوڑ دیتے ہیں۔

ان کا کہنا تھا کہ صوبوں سے ڈسٹرکٹ کو پیسے ملنے کا نظام بننا چاہئے، جب تک ملک میں منتخب بلدیاتی حکومت نہ ہوں عام انتخابات نہیں ہونے چاہئیں، انسان 10  دن تک منہ نہ دھوئے کنگھی نہ کرے تو گھر والے 11 دن نہیں پہچانیں گے، اس شہر کے انفراسٹرکچر کی بھی دھلائی اور کنگھی کی ضرورت ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں