کراچی: فیڈرل بورڈ آف ریونیو (ایف بی آر) کی جانب سے قومی ایئر لائن (پی آئی اے) کے تمام اکاؤنٹس بحال کردیے گئے ہیں۔

تفصیلات کے مطابق پی آئی اے اور ایف بی آر کے مابین سود حاصل مذاکرات کامیاب ہو گئے، جس کے بعد ملک بھر میں قومی ایئر لائن کے تمام اکاؤنٹس بحال کرنے کے احکامات جاری کردیے گئے۔

ترجمان پی آئی اے نے بتایا کہ پی آئی اے اور ایف بی آر کا لارج ٹیکس یونٹ مسئلے کے حل کیلئے مسلسل رابطے میں رہا۔

واضح رہے کہ گزشتہ روز ٹیکس کی عدم ادائیگی پر فیڈرل بورڈ آف ریونیو (ایف بی آر) نے قومی ایئر لائن پی آئی اے کے تمام بینک اکاؤنٹس منجمد کر دیے تھے۔

یاد رہے کہ پی آئی اے کو مجموعی طور پر ساڑھے 4 ارب کی ادائیگی کرنی ہے، پی آئی اے نے فروری سے لیکر اب تک ریٹرن فائل نہیں کیے، ٹریبونل کے آرڈر پر 2 ارب 70کروڑ روپے ادا کرنے ہیں، ادائیگی نہ ہونے پر اکاؤنٹس منجمد کردیے گئے تھے۔

اس کے علاوہ ذرائع نے بتایا تھا کہ پاکستان اسٹیٹ آئل نے بھی پی آئی اے کے جہازوں کو ایندھن بند کرنے کی دھمکی دی ہے، پی ایس او نے پی آئی اے سے 1.5ارب روپے فوری ادائیگی کا مطالبہ کیا ہے۔

پی آئی اے ذرائع نے بتایا تھا کہ ایاسا کے آڈٹ کے دوران ایف بی آر، پی ایس او کے ایسے اقدامات بدقسمتی ہے، ایاسا آڈٹ کے بعد پی آئی اے پر یورپ میں پابندی ہٹ سکتی ہے۔