نگران وزیراعلیٰ سندھ مقبول باقر نے کہا ہے کہ سندھ میں سرمایہ کاری کے بہت زیادہ مواقع موجود ہیں۔

تفصیلات کے مطابق نگران وزیراعلیٰ سندھ جسٹس (ر) مقبول باقر سے قطر کے نئے قونصل جنرل نايف شاهين آر ایم السلیطی کی ملاقات ہوئی۔

جسٹس (ر) مقبول باقر نے اس موقع پر کہا کہ قطر کے نئے قونصل جنرل کو سندھ آنے پر خوش آمدید کہتے ہیں، شہر کراچی کو اپنا گھر سمجھیں۔

ان کا کہنا تھا کہ قطر کی 14 کمپنیاں سندھ میں کام کر رہی ہیں، سندھ میں سرمایہ کاری کے بہت زیادہ مواقع ہیں۔

دوسری جانب نگران وزیراعلیٰ سندھ جسٹس (ر) مقبول باقر نے کہا ہے کہ تھرکول ملک کا واحد سستا بجلی پیدا کرنے کا ذریعہ بن گیا ہے۔

نگران وزیراعلیٰ سندھ جسٹس (ر) مقبول باقر کی زیر صدارت 26 واں تھرکول انرجی بورڈ کا اجلاس ہوا جس میں انرجی بورڈ نے گزشتہ اجلاس کے منٹس منظور کر دیے۔

بریفنگ میں بتایا گیا کہ بورڈ کے فیصلے کے مطابق بلاک ٹو میں مائن کی توسیع 7.6 ایم ٹی پی اے سے 11.2 ایم ٹی پی اے گنجائش کرنے کی منظور دیدی تھی، ایس ایس آر ایل بلاک ون میں 7.8 ایم ٹی پی اے کول نکالنے کی منظوری دے چکی ہے، تھرکول فیلڈ 9100 کلومیٹرز پر پھلا ہوا ہے، اسوقت تک 12 بلاکس بن چکے ہیں، ہر بلاک میں 2 بلین کول ریزرو ہیں، ہر بلاک 30 سال تک 4000 تا 5000 بجلی پیدا کرنے کی صلاحیت رکھتا ہے۔

مقبول باقر کا کہنا تھا کہ تھر کول ملک میں سستی بجلی کے ضروریات پوری کرے گا بلکہ برآمد بھی کر سکتے ہیں، 2015 میں تھرکول کا ٹیرف 60.32 ڈالرز فی ٹن تھا اور آج 2023 میں 30.39 ڈالرز فی ٹن ہے، تھرکول ملک کا واحد سستا بجلی پیدا کرنے کا ذریعہ بن گیا ہے۔

اجلاس میں نگران وزیر ریوینیو یونس ڈھاگا، وزیر قانون عمر سومرو، چیف سیکریٹر ڈاکٹر فخر عالم، سیکریٹری توانائی ریحان بلوچ، شبر زیدی اور دیگر ممبران شریک ہوئے۔