پاکستان میں منشیات کا خطرناک پھیلاؤ جاری ہے، تاہم حالیہ سالوں میں منشیات تک رسائی میں اضافہ ریکارڈ کیا گیا ہے، جس کے وجہ سے منشیات کے عادی ہر سال بڑی تعداد میں مختلف خطرناک بیماریوں میں مبتلا ہو رہے ہیں۔

سرکاری دستاویز کے مطابق پاکستان میں منشیات کے باعث سال 2022 میں 3 لاکھ 41 ہزار 619 مریضوں کے ٹی بی کا شکار ہونے کا انکشاف ہے جبکہ منشیات کی وجہ سے ٹی بی کا شکار ہونے والے تقریباً ساڑھے تین لاکھ مریضوں میں سے 5886 علاج کے باوجود مر گئے ہیں۔

دستاویز میں بتایا گیا ہے کہ منشیات کے باعث ٹی بی کا شکار ہونے والے مریضوں کی دو کیٹاگریز ہیں، ٹی بی کا شکار 339256 مریضوں میں سے 5511 مر چکے ہیں۔

سرکاری دستاویز کے مطابق منشیات کی وجہ ٹی بی سے مرنے والوں کی پہلی قسم کا تناسب 2 فیصد رہا جبکہ 317923 مریض صحت یاب ہوگئے۔

اس کے علاوہ منشیات کی وجہ سے ٹی بی کا شکار ہونے والی دوسری کیٹاگری خطرناک رہی، منشیات کے باعث ٹی بی کا شکار ہونے والے 2363 مریضوں میں سے 375 موت کے منہ میں چلے گئے۔

منشیات کی وجہ سے ٹی بی کا شکار ہونے والی اس خطرناک کیٹاگری میں مرنے والوں کا تناسب 16 فیصد رہا۔ جبکہ خطرناک کیٹاگری میں سے 1560مریض صحت یاب بھی ہوئے۔

دستاویز میں مزید بتایا گیا ہے کہ نیشنل ٹی بی کنٹرول پروگرام کے اس وقت 1700 مراکز کام کررہے ہیں، ٹی بی کا علاج مفت فراہم کیا جارہا ہے، تاہم نیشنل ٹی بی کنٹرول پروگرام پر اس وقت کروڑوں روپے بجٹ صرف کیا جارہا ہے۔