وفاقی وزیر برائے سائنس و ٹیکنالوجی ڈاکٹر عمر سیف نے کہا ہے کہ معاشی ترقی کیلئے ٹیکنالوجی کا کردار انتہائی اہم ہے۔

 تفصیلات کے مطابق وفاقی وزیر برائے سائنس و ٹیکنالوجی ڈاکٹر عمر سیف نے نسٹ کے نیشنل سائنس اینڈ ٹیکنالوجی پارک میں مقامی تحقیق و ترقی ایجنسی (آئی آر اے ڈی اے) کے سنگ بنیاد کی تقریب سے خطاب کرتے ہوئے کہا کہ معاشی ترقی کے حصول میں ٹیکنالوجی کا اہم کردار ہے، ترقی کے لیے جدت طرازی کو آگے بڑھانے، پیداواری صلاحیت کو فروغ دینے اور متنوع صنعتوں میں کارکردگی بڑھانے کی صلاحیت پیدا کرنا ہوگی۔

ڈاکٹر عمر سیف نے آئی آر اے ڈی اے کے مقاصد پر روشنی ڈالتے ہوئے پاکستان میں دفاعی شعبے، تعلیمی اداروں اور صنعت کے درمیان تکنیکی ترقی کے لئے تعاون کو فروغ دینے میں اس کے کردار پر زور دیا۔

تقریب کے دوران ڈاکٹر سیف عمر نے آئی آر اے ڈی اے کے لیے اپنے وژن کا اظہار کرتے ہوئے نسٹ، یونیورسٹیوں، صنعت اور دفاعی شعبے کو شامل کرتے ہوئے ایک مشترکہ کوشش کا تصور پیش کیا۔

 انہوں نے کہا کہ اگرچہ ان شعبوں کے درمیان روابط موجود ہیں لیکن آئی آر اے ڈی اے کا مقصد ان روابط کو باضابطہ اور ادارہ جاتی بنانا ہے۔

ڈاکٹر سیف عمر نے مشترکہ منصوبوں اور مصنوعات کے امکانات پر زور دیا جنہیں ملک کی اقتصادی ترقی میں اہم کردار ادا کرنے کے لئے کمرشلائز کیا جا سکتا ہے۔

ایک تاریخی مثال پیش کرتے ہوئے وفاقی وزیر برائے سائنس و ٹیکنالوجی ڈاکٹر عمر سیف نے 1957 میں روس کی جانب سے سپوتنک کی لانچ اور اس کے بعد امریکہ کی جانب سے ڈی اے آر پی اے کے قیام کا حوالہ دیا۔

 انہوں نے دفاعی شعبے، تعلیمی اداروں اور صنعت کو جوڑنے کی کامیابی پر روشنی ڈالی جس کے نتیجے میں انٹرنیٹ، جی پی ایس اور کرپٹوگرافی جیسی تبدیلی لانے والی ٹیکنالوجیز کی ایجاد اور کمرشلائزیشن ہوئی۔

وفاقی وزیر نےکہا کہ وزارت سائنس و ٹیکنالوجی ایک آزاد ادارے کے طور پر آئی آر اے ڈی اے کی مالی اعانت اور مدد کرے گی، اس اقدام سے تعلیم، دفاع اور صنعت کے سرکردہ افراد کو اکٹھا کیا جائے گا جس سے پاکستان کی تکنیکی ترقی اور معاشی ترقی کو آگے بڑھایا جا سکے گا۔