امیر جماعت اسلامی پاکستان سراج الحق نے کہا ہے کہ میں اللہ پر کامل یقین کے ساتھ کہتا ہوں کہ ہمارا مستقبل روشن ہے۔

تفصیلات کے مطابق امیر جماعت اسلامی پاکستان سراج الحق نے کراچی میں انٹرنیشنل یوتھ کانفرنس کے اختتامی سیشن میں فلسطین و کشمیر اور عالم اسلام کی صورتحال پر گفتگو کرتے ہوئے کہا کہ تمام لوگ جانتے ہے کہ پاکستان مدینہ منورہ کے بعد ایک کلمہ کی بنیاد پر موجود میں آیا، پاکستان کے حالات اب بدل رہے ہیں، ہم ایک امت ہیں ایک جماعت ہیں اور ایک خاندان ہیں، ہمارا حال اور مستقبل ایک ہے ہمارا مستقبل روشن ہے۔

سراج الحق نے کہا کہ آنے والا کل اسلام کا ہے، آنے کا کل امت اسلامیہ کا ہے، اللہ تعالیٰ ان لوگوں کی قبر نور سے بھردے جنہوں نے مسلمانوں کے لیے آواز اٹھائی اور جدوجہد کی، آج ہم شہداء کی وجہ سے آباد ہیں۔

انہوں نے کہا کہ توپوں کے مقابلے میں ایمان کی طاقت آج بھی مؤثر ہے، دنیا کو پیغام دیا کہ حماس کامیاب ہے۔

ان کا کہنا تھا کہ میں اپنے نوجوانوں کو مبارکباد دیتا ہوں جو کام او آئی سی اور حکومت کو کرنا چاہیے تھا وہ آپ نے کیا، یہ عالمی اسلامی تحریکوں کےلیے ایسی جگہ ہے جہاں لوگوں کےلیے دروازے کھلے رہتے ہیں، میں اللہ پر کامل یقین کے ساتھ کہتا ہوں کہ ہمارا مستقبل روشن ہے، اس دنیا میں سوائے اسلام کے کامیابی کا کوئی راستہ نہیں ہے۔