پاکستان پیپلزپارٹی کی رہنما سینیٹر شیری رحمان نے کہا ہے کہ پیپلزپارٹی بروقت انتخابات چاہتی ہے۔

تفصیلات کے مطابق پاکستان پیپلزپارٹی کی رہنما سینیٹر شیری رحمان نے بلاول ہاؤس کراچی میڈیا سیل میں ہنگامی پریس کانفرنس سے خطاب کرتے ہوئے کہا کہ آج پیپلزپارٹی کی مرکزی کور کمیٹی کا اجلاس ہوا، بلاول بھٹو کی زیر صدارت زوم پر میٹنگ ہوئی، اجلاس میں ملک کی صورت کا جائزہ لیا ہے اور سپریم کورٹ کے انتخابات کے فیصلے کو سراہا گیا، پیپلزپارٹی چاہتی ہے انتخابات وقت پر ہوں۔

 شیری رحمان نے کہا کہ پارلیمانی بورڈ انتخابی دیگر پراسیس ہمارا شروع ہوگیا ہے،27 دسمبر کو شہید بی بی کی برسی پر مہم کا آغاز کریں گے، چیئرمین بلاول مستحق ہیں کہ انہوں مستقل مزاجی سے مہم کو جاری رکھا، کتنا ابہام تھا الیکشن کے حوالے سے مگر بلاول بھٹو سردی ہو یا گرمی کمپین میں لگے رہے۔

پاکستان پیپلزپارٹی کی رہنما سینیٹر شیری رحمان نے کہا کہ پیپلز پارٹی نے ہمیشہ مشکل حالات کا مقابلہ کیا ہے، پیپلز پارٹی نے بہت قربانیاں دی ہیں، اب بھی ہم صرف یہ چاہتے ہیں کہ الیکشن بروقت ہوں۔

شازیہ مری کا خطاب

پاکستان پیپلزپارٹی کی شازیہ مری نے بلاول ہاؤس کراچی میڈیا سیل میں ہنگامی پریس کانفرنس سے خطاب کرتے ہوئے کہا کہ الیکشن شیڈول کے اعلان ہوتے ہی پیپلزپارٹی پہلی جماعت ہے جس نے اجلاس بلایا، اعلیٰ عدلیہ کی کوشش بھی سامنے آئی ہے اور اس پر شکر گزار بھی ہیں۔

شازیہ مری نے کہا کہ پیپلزپارٹی کی 54 دن پہلے الیکشن شیڈول کی ڈیمانڈ تھی اور قانون بھی یہی کہتا ہے، یہی چاہتے ہیں کہ الیکشن کے پروسیس میں کوئی روڑے نہ اٹکائے، پاکستان کے عوام کو یہ پیغام دیں گے آئیے ہمیں جوئن کیجئے اور موقع دیجئے، جو ترقی سندھ میں ہوئی وہ ترقی پورے پاکستان میں دیکھنے کے لئے ہمارا ساتھ دیں۔