اسلام آباد: نگران وزیر اعظم انوار الحق کاکڑ نے صحت کے شعبے کی موجودہ صورتحال اور اس میں اصلاحات کی ضرورت پر زور دیا ہے۔

تفصیلات کے مطابق نگران وزیرا عظم کی زیر صدارت ملک میں طبی تعلیم اور مریضوں کی دیکھ بھال میں اصلاحات کے لیے تشکیل شدہ ٹاسک فورس کا اجلاس ہوا جس میں ملک میں صحت کے شعبے کو بین الاقوامی معیار پر لانے کے لیے بنائی گئی حکمت عملی پر بریفنگ دی گئی۔

نگران وزیر اعظم نے اجلاس میں ہدایت دی کہ پاکستان میں طبی تعلیم کو ہم عصر تقاضوں سے ہم آہنگ کیا جائے۔

اجلاس میں انوار الحق کاکڑ نے صحت کے شعبے کی موجودہ صورتحال اور اس میں اصلاحات کی ضرورت پر زور دیتے ہوئے کہا کہ افرادی قوت کی عالمی مارکیٹ میں صحت کے شعبے کے ماہرین کی مانگ پوری کرنے کے لیے ملک میں شعبہ صحت میں اصلاحات لائی جائیں۔

نگران وزیر اعظم نے مزید کہا کہ نرسنگ ایک انتہائی اہم شعبہ ہے اور اس کی ترقی کیلئے مزید توجہ کی ضرورت ہے۔

اس کے علاوہ اجلاس میں وزارت صحت، کالج آف فزیشنز اینڈ سرجنز آف پاکستان، پاکستان میڈیکل اینڈ ڈینٹل کونسل، ہائیر ایجوکیشن کمیشن اور ملک کی میڈیکل یونیورسٹیز کے اشتراک سے شعبہ صحت کیلئے لیے گئے اقدامات پر بھی بریفنگ دی گئی۔

اجلاس کو بریفنگ دی گئی کہ شعبہ صحت میں اصلاحات کے لیے تین مراحل پر مشتمل حکمت عملی بنائی گئی ہے، اس حکمت عملی کا مقصد پاکستانی شعبہ صحت میں بین الاقوامی معیار کے مطابق قواعد و ضوابط کا نفاذ یقینی بنانا ہے۔

اجلاس میں شعبہ صحت میں گریجویٹ اور پوسٹ گریجویٹ سطحوں پر اصلاحاتی حکمت عملی پر بھی بریفنگ دی گئی۔

بعدازاں نگران وزیراعظم نے معاون خصوصی ڈاکٹر عامر بلال کی قیادت میں شعبہ صحت میں اصلاحات کے لیے ٹاسک فورس کے اقدامات کو سراہا۔