مسلم لیگ ن کے صوبائی صدر رانا ثناء اللہ نے کہا ہے کہ پی ٹی آئی حکومت میں سیاست کو ناقابل تلافی نقصان پہنچا۔

تفصیلات کے مطابق پاکستان مسلم لیگ ن کے پارلیمانی بورڈ کے پہلے اجلاس کے بعد پارٹی جنرل سیکرٹری احسن اقبال اور صوبائی صدر رانا ثناء اللہ نے میڈیا سے گفتگو کرتے ہوئے کہا کہ 18 ویں ترمیم منطقی انجام تک پہنچانے کا پروگرام ہے،18 ویں ترمیم ادھوری ہے،ن لیگ ترمیم کو مکمل کرے گی۔

احسن اقبال نے کہا کہ مرکز سے صوبوں تک چیزیں گئیں،صوبوں سے نیچے نہیں گئیں، مضبوط بلدیاتی نظام سے نیچے کی سطح تک تمام چیزیں لیکر جائیں گے، اگلے الیکشن میں ن لیگ کا بیانیہ کارکردگی ہوگی۔

انہوں نے کہا کہ بلاول بھٹو سے غیر ذمہ دارانہ بیانات کی امید نہیں تھی، درخواست گزارامیدواروں میں نوجوان بھی شامل ہیں، پاکستان کودرپیش چیلنجز کا حل مضبوط،مستحکم منتخب حکومت ہے، ماضی میں ہم نے4سال میں11ہزار میگاواٹ کے بجلی کے منصوبے لگائے۔

ان کا کہنا تھا کہ ن لیگ انتخابات کے لیے سنجیدہ کوششیں شروع کرچکی ہے، بہترین امیدواروں کا انتخاب کرکےٹکٹ جاری کریں گے۔

مسلم لیگ ن کے صوبائی صدر رانا ثناء اللہ نے مزید کہا کہ سی پیک کے ذریعے25ارب کی سرمایہ کاری لائی گئی، قوم کی امیدیں ن لیگ کے ساتھ وابستہ ہیں۔

علاوہ ازیں مسلم لیگ ن کے صوبائی صدر رانا ثناء اللہ نے میڈیا سے گفتگو کرتے ہوئے کہا کہ نوازشریف نے خود ایک ایک امیدوار کا انٹرویو کیا ہے، ن لیگ کا پہلا پارلیمانی بورڈ کا اجلاس7گھنٹےجاری رہا۔

انہوں نے کہا کہ دانیال عزیز کے بیانات کا سختی سے نوٹس لیا گیا، دانیال عزیز سے تقاضا کیا گیا کہ ایسے بیانات سے گریز کریں، پیپلزپارٹی پنجاب میں ن لیگ مخالف ووٹ حاصل کرنا چاہتی ہے، ن ی لیگ پر تنقید کرکے ووٹ لے سکتی ہے توپی پی کو مکمل آزادی ہے۔

ان کا کہنا تھا کہ پی ٹی آئی حکومت میں سیاست کو ناقابل تلافی نقصان پہنچا، امید ہےپی پی قیادت الیکشن پر بات کرتے ہوئے جمہوری روایات کو برقرار رکھے گی، ہمارے خلاف بات کرکے ووٹرز کو متاثر کیا جاسکتا ہے۔