پیپلز پارٹی رہنما سید خورشید شاہ نے کہا ہے کہ ماضی کا بل معاف کروا کر 300 یونٹ تک مفت بجلی دیں گے۔

 تفصیلات کے مطابق پیپلز پارٹی رہنما سید خورشید شاہ نے سکھر میں ورکرز کنونشن سے خطاب کرتے ہوئے کہا کہ اس شہر نے تیزی سے ترقی کی ہے، دنیا کی پہلی ہیریٹج یونیورسٹی قائم کی گئی، 15 سال پہلے ایک ہی گرلز ڈگری کالج تھا آج ہر علاقے میں ڈگری کالجز ہیں، اسٹیٹ آف دی آرٹ ومین یونیورسٹی قائم کی گئی ہے، ہم چاہتے ہیں ہمیں پڑھی لکھی مائیں ملیں۔

سید خورشید شاہ نے کہا کہ این آئی سی وی ڈی اسپتال سکھر میں ہے، کینسر اسپتال یہاں میں قائم کیا جارہا ہے، ٹراما سینٹر اور برن سینیٹر بنائے جارہے ہیں، اداروں کے آنے سے روزگار آئے گا۔

انہوں نے کہا کہ پہلے ڈسٹرک ماڈل بنائے جاتے تھے ہم نے صوبہ ماڈل بنا کر دکھایا، کچے کو مضبوط بنانے کا کام چل رہا ہے، سکھر کے ہائی ویز کو سر سبز و شاداب بنا رہے ہیں۔

ان کا کہنا تھا کہ روہڑی کا سب سے بڑا مطالبہ بھینس کالونی کا تھا جو کہ زیر تعمیر ہے، 15 سالوں میں 800 کلو میٹرز تعمیر کیے ہیں، پیپلز پارٹی نے اپنا مینی فیسٹو دے دیا ہے۔

 پیپلز پارٹی رہنما سید خورشید شاہ نے مزید کہا کہ ماضی کا بل معاف کروائیں گے اور 300 یونٹ تک مفت بجلی دیں گے، 80 لاکھ خواتین کو بینظیر بھٹو کارڈ دیں گے، ایک لیڈر نے کہا کہ 50 لاکھ گھر دوں گا مگر سندھ حکومت نے 30 لاکھ گھر تعمیر کرنا شروع کردیے ہیں، حکومت ملی تو دیگر صوبوں میں بھی تیس لاکھ گھر دیں گے۔