امیر جماعت اسلامی سراج الحق نے کہا ہے کہ کسی سیاسی جماعت نے اقتدار میں آکر پاکستان میں قرآن کا نظام لانے کی بات نہیں کی۔

تفصیلات کے مطابق بہاولپور میں سراج الحق نے جلسے سے خطاب کرتے ہوئے کہا کہ آج بہاولپور میں خواتین کا بہت بڑا اجتماع ہے، بہاولپور میں آج تک خواتین کا اتنا بڑا جلسہ نہیں ہوا۔

انہوں نے کہا کہ اس وقت غزہ جل رہا ہے، ہمارے بہن بھائی اس وقت جہاد میں ہیں، امریکی بمبوں کی زد میں ہیں، میں اس مسئلے پر ایران، ترکی، قطر گیا، وہاں کے حکمرانوں سے بات کی۔

ان کا کہنا تھا کہ ہمارے پاس فوج ہتھیار موجود ہیں، لیکن غزہ کو بچانے کے لئے آگے نہیں بڑھ رہے، آج غزہ میں 25 لاکھ افراد بم و بارود کی ذد میں ہیں، اسرائیل بمباری میں موت بانٹ رہا ہے، غزہ میں لوگ ہمارے انتظار میں ہیں۔

سراج الحق نے کہا کہ میں غزہ و فلسطینی ماؤں کو سلام پیش کرتا ہوں، جماعت اسلامی صرف اور صرف قرآن کا نظام نافذ کرنا چاہتے ہیں۔

انہوں نے کہا کہ قرآن ہمیں بتاتا ہے کہ اللہ کے سوا کوئی اطاعت کے لائق نہیں، قرآن کا پیغام ہے کہ مظلوم کے ساتھ کھڑے ہو اور ظالم کے خلاف کھڑے ہوجاؤ۔

 ان کا کہنا تھا کہ دنیائے مسلمان طاقتیں اپنے جہاز اور اپنا اسلحہ مسلمانوں کے تحفظ کے لیئے استعمال نہیں کررہے، جماعت اسلامی اپنے فلسطینی بہن بھائیوں کے ساتھ کھڑی ہے۔

سراج الحق نے کہا کہ پانچ بار پیپلز پارٹی ، بار بار مسلم لیگ ن نے اور پونے چار سال پی ٹی آئی نے اور پینتیس سال مارشل لاء والوں نے حکومت کی لیکن کسی ایک نے بھی پاکستان میں قرآن کا نظام لانے کی بات نہیں کی۔

انہوں نے کہا کہ مسئلہ کشمیر پر کسی حکومت نے انکی آزادی کے لیئے کچھ نہیں کیا، پرویز مشرف کے دور میں کراچی سے عافیہ صدیقی کو امریکہ کے حوالے کیا گیا، جھوٹے الزام میں عافیہ کو 80 سال کی قید سنا دی گئی۔

ان کا کہنا تھا کہ بدترین تشدد نے عافیہ صدیقی حالت خراب کر دی ہے لیکن اس بہن کی ہمت کو سلام ہے کہ وہ انکے سامنے نہیں جھکی اور اللہ کے فرمان پر قائم و دائم ہے، جماعت اسلامی کی حکومت آئی تو عافیہ کو رہائی دلائیں گے۔