قطر میں پاکستانی آئی ٹی کمپنیوں کی شاندار پذیرائی ہوئی اور دو طرفہ ٹیکنالوجی امور پر مثبت پیش رفت سامنے آئی ہے۔

تفصیلات کے مطابق نگران وفاقی وزیر آئی ٹی ڈاکٹر عمر سیف کی قیادت میں وفد نے دوحہ میں منعقدہ پاک قطر آئی ٹی کانفرنس میں شرکت کی۔

وفد میں اسپیشل انویسٹمنٹ فیسیلیٹیشن کونسل، پاکستان سافٹ ویئر ایکسپورٹ بورڈ کے نمائندگان، پاکستان سافٹ ویئر ہاؤسز ایسوسی ایشن کے چیئرمین زوہیب خان اور 30 آئی ٹی کمپنیوں نے بھی شرکت کی۔

اس موقع پر ڈاکٹر عمر سیف نے کانفرنس سے خطاب کرتے ہوئے کہا کہ اس کانفرنس کا مقصد پاکستان اور قطر کے سرمایہ کاروں اور کمپنیوں کے مابین تعلقات کو فروغ دینا ہے، چاہتے ہیں پاکستان اور قطر کی کمپنیاں سرمایہ کاری اور ہنرمندی میں اشتراک کریں۔

انہوں نے کہا کہ آرٹیفیشل انٹیلیجنس، سائبر سیکیورٹی جیسے شعبوں میں مشترکہ و محفوظ پلیٹ فارم تیار کیا جاسکتا ہے، 30 ہزار آئی ٹی کمپنیاں پاکستان کو ڈیجیٹل ورلڈ سے منسلک کرنے کیلئے بھرپور کردار ادا کررہی ہیں۔

نگران وزیر آئی ٹی نے مزید کہا کہ سالانہ 75 ہزار آئی ٹی گریجویٹس تیار ہورہے، عالمی معیار کی تربیت فراہمی کیلئے اقدامات کررہے ہیں، پاکستان کے آئی ٹی ہنر مند اور کمپنیاں عالمی طور پر تسلیم شدہ ہیں۔