صدر مملکت ڈاکٹر عارف علوی اور ایرانی صدر ابراہیم رئیسی کے درمیان ٹیلیفونک رابطہ ہوا ہے۔

  تفصیلات کے مطابق صدر مملکت ڈاکٹر عارف علوی اور ایرانی صدر ابراہیم رئیسی نے ٹیلیفونک گفتگو میں غزہ میں جاری قتل عام اور انسانیت کے خلاف جرائم کے خاتمے کے لیے اسلامی ممالک کی جانب سے مربوط کوششوں کی ضرورت پر زور دیا ہے۔

صدر مملکت ڈاکٹر عارف علوی نے کہا کہ غزہ سمیت مقبوضہ فلسطین میں جاری اسرائیلی جارحیت اور پیدا شدہ سنگین صورتحال پر گہری تشویش ہے، خواتین اور بچوں سمیت 19 ہزار سے زائد فلسطینیوں کے جاں بحق ہونے کے باوجود اقوام متحدہ کی سلامتی کونسل جنگ بندی کرانے اور اسرائیلی مظالم کو روکنے میں ناکام رہی ہے۔

ڈاکٹر عارف علوی نے کہا کہ دارالحکومت القدس الشریف کے ساتھ ایک آزاد فلسطینی ریاست پر مبنی مسئلہ فلسطین کا منصفانہ حل مشرق وسطیٰ میں دیرپا امن کے لیے اہم ہے۔

اس موقع پر دونوں رہنماؤں نے خطہ بالخصوص غزہ کی صورتحال اور دوطرفہ اقتصادی تعاون پر تبادلہ خیال کیا۔

صدر مملکت ڈاکٹر عارف علوی نے تمام سفارتی اقدامات کے لیے پاکستان کی حمایت کا اعادہ اور ایران کے اقدامات کی تعریف کی۔

ڈاکٹر عارف علوی نے جموں و کشمیر تنازعہ پر اصولی مؤقف اور فلسطینی کاز کی حمایت پر ایرانی قیادت کو  سراہا۔

صدر مملکت ڈاکٹر عارف علوی نے 15 دسمبر 2023 کو سیستان بلوچستان میں ایرانی پولیس اسٹیشن پر دہشت گردانہ حملے پر ایران کی حکومت اور برادر عوام سے دلی تعزیت کا اظہار کیا، دہشتگردی سے نمٹنے کے لیے ایران کے ساتھ مل کر کام کرنے کے عزم کا اظہار کیا۔

 دونوں صدور نے باہمی  اقتصادی، تجارتی اور ثقافتی تعلقات کو مزید بہتر بنانے کے لیے مل کر کام کرنے پر بھی اتفاق کیا۔