اسلام آباد: حکومت نے منی لانڈرنگ اور دہشت گردی کیلئے مالی تعاون کی روک تھام کا فیصلہ کر لیا۔

ذرائع نے بتایا ہے کہ آئی ایم ایف کی سفارشات پر منی لانڈرنگ اور ٹیرر فنانسنگ کو روکنے کیلئے کمیشن بنایا جائے گا، کمیشن منی لانڈرنگ اور دہشت گردی کیلئے اندرونی و بیرونی مالی اعانت روکنے کیلئے ریگولیٹری اتھارٹی کے طور پر کام کرے گا۔

ذرائع کے مطابق وزارت خزانہ نے کمیشن کے قیام کیلئے سمری وفاقی حکومت کو بھجوادی ہے، سمری میں کمیشن کے چیئرمین کیلئے شاہد علی خان اور مشتاق احمد سکھیرا کے نام تجویز دی گئی ہے، تاہم شاہد علی خان سابق وفاقی سیکریٹری اور مشتاق احمد سکھیرا سابق آئی جی ہیں۔

اس کے علاوہ وزارت خزانہ نے ابتدائی طور پر چیئرمین کی تقرری کیلئے سمری وزیر اعظم اور کابینہ کو بھجوائی ہے، کمیشن کے قواعد و ضوابط اور تنظیمی ڈھانچے کی منظوری بعد میں دی جائے گی۔

ذرائع کا کہنا تھا کہ کمیشن ملک میں بینکوں اور فنانشل ٹرانزیکشن کا معائنہ اور نگرانی کرے گا اور دہشت گردی کیلئے مالی اعانت کی روک تھام کیلئے اقدامات کرے گا۔

ذرائع کے مطابق کمیشن انشورنس اور تکافل میں سرمایہ کاری کی معلومات اینٹی منی لانڈرنگ قانون کے تحت حاصل کرسکے گا، کمیشن سیونگ اکاؤنٹس، انشورنس پالیسی کافائدہ اٹھانے والے یا نامزد کردہ شخص کے اکاؤنٹس کی چھان بین بھی کر سکے گا۔

ذرائع نے مزید بتایا کہ کمیشن کاروبار اور تجارتی معاہدوں کے لین دین اور اکاؤنٹس کی چھان بین اورنگرانی بھی کرسکے گا اور کمیشن جائیداد کی خریدوفروخت کی معلومات بھی لے سکے گا۔