اسلام آباد: نگران وزیراعلیٰ خیبر پختونخوا جسٹس (ر) سید ارشد حسین شاہ کی چیف الیکشن کمشنر سکندر سلطان راجہ سے اہم ملاقات ہوئی ہے۔

تفصیلات کے مطابق نگران وزیراعلیٰ کے پی کے جسٹس (ر)  ارشد حسین الیکشن کمیشن پہنچے جہاں انکی الیکشن کمیشن حکام سے ملاقات ہوئی۔

ملاقات میں خیبر پختونخوا میں امن و امان کی صورتحال اور انتخابات کیلئے انتظامی امور پر مشاورت کی گئی۔

دوران ملاقات نگران وزیراعلیٰ کے پی اور چیف الیکشن کمشنر کے درمیان صوبے میں امن و امان کی صورتحال پر بھی بات چیت ہوئی۔

علاوہ ازیں ملاقات میں چیف الیکشن کمشنر نے سوال کیا کہ کیا کے پی میں ایسی صورتحال ہے کہ الیکشن ہوسکیں؟ نگران وزیراعلیٰ کے پی نے سوال کا جواب دیتے ہوئے کہا کہ ہم صوبے میں انتخابات کے لئے تیار ہیں۔

واضح رہے کہ الیکشن کمیشن اعلان کر چکا ہے کہ جنوری کے آخری ہفتے میں انتخابات کرائے جائیں گے جبکہ سپریم کورٹ میں 11 فروری کی تاریخ سامنے آئی تاہم صدر سے مشاورت کے بعد 8 فروری کی تاریخ پر اتفاق ہوا تھا۔

قومی اسمبلی اور چاروں صوبائی اسمبلیوں کے انتخابات آٹھ فروری کو کرائے جائیں گے جس کا الیکشن کمیشن کی جانب سے باضابطہ طور پر نوٹیفکیشن بھی جاری کردیا گیا ہے۔

دوسری جانب آئندہ عام انتخابات کے انعقاد سے متعلق اہم ترین معاملہ طے ہوگیا، الیکشن کمیشن نے عام انتخابات کیلئے حلقہ بندیوں کی حتمی فہرست جاری کردی، ڈیجیٹل مردم شماری کے تحت حلقہ بندیاں مکمل کی گئیں۔

اس کے علاوہ وزارت خزانہ کی جانب سے الیکشن کمیشن کو ملک میں آئندہ انتخابات کیلئے 17.4 ارب روپے جاری کردیے گئے جبکہ جولائی 2023 میں الیکشن کمیشن کیلئے 10 ارب روپے جاری کیے گئے تھے، تاہم وزارت خزانہ نے ملک میں عام انتخابات کیلئے اب تک 27.4 ارب روپے جاری کیے۔

مزید برآں چیف الیکشن کمشنر سکندر سلطان راجہ نے اپنے بیان میں کہا تھا کہ حلقہ بندیاں شائع ہوچکی ہیں باقی سب کچھ اپنے وقت پر ہوگا، ہم سب کچھ اپنے وقت سے پہلے کررہے ہیں، الیکشن شیڈول، آر آوز اور ڈی آر آوز کی تعیناتی بھی وقت پر ہوگی۔

بعدازاں الیکشن کمیشن کی جانب سے عام انتخابات کی تیاریاں جاری ہیں تاہم الیکشن کے اعلان مسلم لیگ ن اور متحدہ قومی موومنٹ پاکستان (ایم کیو ایم) نے 8 فروری کو ہونے والے عام انتخابات مل کر لڑنے کا اعلان کیا جبکہ پیپلز پارٹی نے عام انتخابات میں سولو فلائٹ لینے کا فیصلہ کیا تھا۔