اسلام آباد: عام انتخابات 2024 کے انتخابی نشانات کے حوالے سے الیکشن کمیشن آف پاکستان نے ڈی آر اوز، آر اوز کو ہدایات جاری کی ہیں۔

الیکشن کمیشن نے ڈی آر اوز اور آر اوز کو ہدایت جاری کرتے ہوئے کہا کہ ریٹرننگ افسران اس مرحلے پر انتخابی نشانات کی تبدیلی سے اجتناب کریں، انتخابی نشان میں کوئی تبدیلی لازمی ہو تو کمیشن سے پیشگی اجازت لی جائے۔

الیکشن کمیشن نے مزید کہا کہ بیلٹ پیپرز کی چھپائی کا عمل شروع ہو چکا ہے، ہو سکتا ہے اس مرحلے پر انتخابی نشان کی تبدیلی ممکن نہ ہو سکے۔

یاد رہے کہ الیکشن کمیشن آف پاکستان نے بیلٹ پیپرز کی چھپائی کے لئے کوائف پریٹنگ کارپوریشن کو بھجوا دیے ہیں، اب آزاد امیدوار اپنے انتخابی نشان تبدیل نہیں کرواسکیں گے۔

ذرائع نے بتایا کہ ریٹرننگ افسران کی جانب سے انتخابی نشان الاٹ کیے جاچکے ہیں، اب انتخابی نشان تبدیل نہیں ہوسکیں گے۔

بلوچستان اور سندھ کے بلیٹ پیپرز کی چھپائی کراچی میں ہوگی، پہلے بلوچستان کے قومی اور صوبائی اسمبلی کے بلیٹ پیپرز چھاپے جائیں گے۔

اس کے علاوہ پنجاب اور کے پی کے کے قومی اور صوبائی اسمبلی کے بیلٹ پیپرز کی چھپائی پرٹنگ کارپوریشن آف پاکستان میں ہوگی۔

واضح رہے کہ الیکشن کمیشن پاکستان نے پرنٹنگ کارپوریشن آف پاکستان کو 8 فروری کو ہونے والے عام انتخابات کے لیے واٹر مارک والے 25 کروڑ بیلٹ پیپرز تیار کرنے کا کام سونپ دیا۔

گزشتہ روز الیکشن کمیشن نے اپنے اجلاس میں آئندہ عام انتخابات کے لیے بیلٹ پیپرز کی چھپائی کی منظوری دی تھی اور اجلاس میں کہا گیا تھا کہ بیلٹ پیپرز پر مخصوص واٹر مارکس بنائے جائیں گے جنہیں 3 مختلف مشینوں کے ذریعے چھاپا جائے گا۔