بھارتی میڈیا افغان طالبان کے بیانیہ کو درست ثابت کرنے کے لیے سرگرم ہوگیا۔

بھارتی پروپیگنڈا کو مزید تقویت دینے میں بھارتی ذرائع ابلاغ قدم با قدم بھارتی حکومت کے منصوبوں پر عمل پیرا ہے۔

اسی سلسلے میں بھارتی خبررساں ادارے ورلڈ از ون نیوز اور بھارتی حکومت کی زبان بولنے والی اے این آئی نیوز ایجنسی نے افغان وزیر دفاع ملا یعقوب مجاہد کے بیان کا حوالہ دے کر پاکستان پر بغیر شواہد کے کیچڑ اچھالنا شروع کردیا ہے۔

مذکورہ بالا بھارتی نیوز ایجنسیز نے افغان خبر رساں ادارے طلوع  نیوز کی خبرکا حوالہ دیتے ہوئے افغان طالبان کے عبوری وزیر دفاع ملا یعقوب مجاہد کا بیان شائع کیا۔

بیان میں ملا یعقوب مجاہد کا کہنا تھا ’’سال 2023 میں افغانستان میں 20 سے زائد پاکستانیوں کو دہشت گردی کی کارروائیوں میں ملوث ہونے پر ہلاک کیا گیا‘‘۔

یہ بیان دراصل اس حقیقت پر پردہ ڈالنے کی کوشش ہے جس کے مطابق پاکستان نے افغان طالبان کو شواہد کے ساتھ بتایا تھا کہ پاکستان میں دہشت گردی اور خود کش حملوں میں افغان شہری ملوث ہیں۔

پاکستان نے اپنے کیس کو مضبوط کرنے کے لیے افغان طالبان کو ٹھوس شواہد بھی پیش کیے مگر افغان طالبان کی جانب سے میڈیا کا سہارا لے کر جو الزامات عائد کئے گئے ہیں انہیں سچ ثابت کرنے کے لیے کوئی ٹھوس شواہد موجود نہیں ہیں اور نہ ہی انہیں براہ راست پاکستان کو پیش کیا گیا ہے۔

افغان طالبان کے وزیر دفاع ملا یعقوب مجاہد خطے کے دیگر ممالک کو اپنی سرحدوں کی نگرانی کا مشورہ تو دے رہے ہیں تاہم افغانستان کی سرحد سے جو دہشت گردی پاکستان میں ہو رہی ہے وہ ان کی نظروں سے اوجھل ہے۔

افغان وزیر دفاع کا دعویٰ ہے کہ ان کے اقتدار سنبھالنے کے بعد افغانستان کی سرزمین سے دوسرے ممالک میں دہشت گردی میں 90 فیصد کمی آئی حالانکہ گذشتہ ایک سال کے اعداد و شمار اس کی نفی کرتے ہیں اور پاکستان میں ہونے والی دہشت گردی میں افغانیوں کی کثیر تعداد شامل ہے۔

طلوع  نیوز کے مطابق افغان طالبان کے وزیر دفاع کا کہنا ہے کہ امریکہ یا اس کے اتحادیوں کی جانب سے چھوڑا گیا اسلحہ اسمگل کرنے کے الزامات بے بنیاد ہیں تاہم پاکستان نے شواہد کے ساتھ پاکستان میں ہونے والی دہشت گردی کے واقعات میں یہ اسلحہ بھی افغان طالبان کو دکھایا ہے۔

بھارت اپنی روایتی پالیسی کو جاری رکھتے ہوئے ملا یعقوب مجاہد کے بیان کو بڑھا چڑھا کر پیش کر رہا ہے جو کہ بھارت اور افغان طالبان کے گٹھ جوڑ کو واضح طور پر ثابت کرتا ہے۔