اسلام آباد: ملک بھر میں ریٹرننگ افسران کی جانب سے مسترد اور منظور کیے گئے کاغذات نامزدگی کی تفصیل جاری کردی گئی ہے۔

ذرائع الیکشن کمیشن کے مطابق قومی اور صوبائی اسمبلیوں کی جنرل نشستوں کے لئے جمع کروائے گئے 24698 کاغذات نامزدگی میں سے 22711 منظور کیے گئے ہیں۔

ذرائع کا کہنا تھا کہ ریٹرننگ افسران نے 3240 کاغذات نامزدگی مسترد کیے جبکہ قومی اسمبلی کے لئے ملک بھر سے 7473 امیدواروں نے  کاغذات جمع کرائے گئے۔

الیکشن کمیشن نے بتایا کہ1024 امیدواروں کے کاغذات نامزدگی مسترد ہوئے جبکہ قومی اسمبلی الیکشن کے لئے 6449 امیدواروں کے کاغذات نامزدگی منظور کیے گئے۔

واضح رہے کہ الیکشن 2024 کیلئے کاغذات نامزدگی منظور یا مسترد ہونے کے فیصلوں کے خلاف اپیلیں آج سے دائر کی جائیں گی۔

ملک بھر میں عام انتخابات کیلئے کاغذات نامزدگی جمع ہونے، منظور یا مسترد ہونے کا مرحلہ مکمل ہو گیا ہے، ریٹرننگ افسروں کے فیصلوں پر اپیلوں کا عمل آج سے 3 جنوری تک جاری رہے گا، ان اپیلوں پر انتخابی ٹریبونل 10جنوری تک فیصلہ کریں گے جبکہ امیدوار اپنے کاغذات 12 جنوری تک واپس لے سکیں گے۔

امیدواروں کو انتخابی نشان 13 جنوری کو دیے جائیں گے جبکہ عام انتخابات 8 فروری کو ہوں گے، ملک بھر کے اضلاع میں ریٹرننگ افسران کی جانب سے کاغذات نامزدگی جانچ پڑتال کا عمل مکمل کرنے کے بعد امیدواروں کی فہرستیں جاری کر دی گئیں، ان فہرستوں میں کاغذات نامزدگی مسترد کیے جانے والوں میں ملک کی کئی بڑی سیاسی شخصیات بھی شامل تھیں۔

پاکستان تحریک انصاف کے بانی سمیت سابق وزیر خارجہ شاہ محمود قریشی اور پی ٹی آئی کے متعدد رہنماؤں کے کاغذات نامزدگی مسترد کر دیے گئے، اسی طرح سابق وزیر داخلہ شیخ رشید احمد اور پنجاب کی سابق وزیر یاسمین راشد، اختر مینگل، فواد چوہدری اور انکی اہلیہ حبا فواد، اعظم سواتی، ذوالفقار مرزا، فہمیدہ مرزا اور انکے بیٹے کے کاغذات نامزدگی بھی مسترد کردیے گئے۔

دوسری جانب ن لیگ کے صدر اور سابق وزیرا عظم شہباز شریف، نواز شریف، بلاول بھٹو زرداری اور صادق سنجرانی سمیت دیگر کے کاغذات نامزدگی منظور ہو گئے۔