استحکام پاکستان پارٹی (آئی پی پی) کے چیئرمین جہانگیر ترین نے کہا ہے کہ ملک ایسے نہیں چلتے جیسے گزشتہ ادوار میں چلائے گئے۔

تفصیلات کے مطابق آئی پی پی کے چیئرمین جہانگیر ترین نے لودھراں میں مختلف شخصیات سے ملاقاتیں کیں جبکہ امیدوار برائے حلقہ پی پی 228 نذیر خان بھی جہانگیر ترین کے ہمراہ موجود تھے۔

جہانگیر ترین نے سابق تحصیل ناظم سید اصغر شاہ گیلانی، پارٹی رہنماؤں اور کارکنوں سے بھی ملاقاتیں کیں۔

اس موقع پر جہانگیر ترین نے گفتگو کرتے ہوئے کہا کہ لودھراں کے لوگوں نے مجھے پناہ عزت دی ہے، میرا فرض ہے کہ یہاں کے عوام کی خدمت کے ذریعے انکا قرض چکاؤں، انشاء اللہ لوگوں کو پتہ چلے گا کہ ہم نے اپنا ووٹ صحیح جگہ دیا ہے۔

انہوں نے کہا کہ میری عمر کے ساتھ ساتھ کام کرنے کا جذبہ بھی بڑھ گیا ہے، عوام نے کامیاب کیا تو پورے پاکستان میں ترقی یافتہ لودھراں کا نام ہوگا۔

آئی پی پی کے چیئرمین نے کہا کہ میں نے نئی پارٹی اس لیے بنائی کہ 10/12 سال ایک جماعت کے لئے دن رات کام کیا، مگر جب وہ لیڈر صاحب وزیر اعظم بنے تو سب کچھ بدل گیا، وزیر اعظم کی کرسی پر بیٹھتے ہی لوگوں نے انکی تعریفوں کے پل باندھنا شروع کردیے۔

انکا کہنا تھا کہ وزیر اعظم کی کرسی خطرناک چیز ہے، بادشاہ سمجھتا ہے میں ہی سب کچھ ہوں، لوگ عوام کو بھی بھول جاتے ہیں جو عوام انہیں وزیر اعظم بناتی ہے۔

جہانگیر ترین نے کہا کہ پرانی باتیں چھوڑ کر میں نئی باتیں کرونگا، جو ہوگیا گزر گیا، اب ہمیں آگے کی طرف دیکھنا ہے، اب ہمیں ملک کا سوچنا ہے، پاکستان ترقی کریگا تو لودھراں اور عوام ترقی کرینگے۔

انہوں نے مزید کہا کہ ملک ایسے نہیں چلتے جیسے گزشتہ ادوار میں چلائے گئے، ملک کی معیشت مضبوط، نوجوانوں کو نوکریاں فراہم کرنا ہماری پہلی ترجیح ہوگی، دنیا میں پاکستان کی عزت ہونی چاہیے، ہمیں ملک کے لئے سوچنا ہوگا۔