پشاور: انتخابی نشان بحال نہ کرنے اور سرٹیفیکیٹ فوری طور پر ویب سائٹ پر اپلوڈ نہ کرنے کے معاملے پر پاکستان تحریک انصاف (پی ٹی آئی) نے الیکشن کمیشن کے خلاف پشاور ہائی کورٹ میں توہین عدالت کی درخواست دائر کردی ہے۔

تفصیلات کے مطابق پاکستان تحریک انصاف (پی ٹی آئی) نے پشاور ہائی کورٹ میں توہین عدالت درخواست دائر کی جس میں چیف الیکشن کمشنر، سیکریٹری اور ممبران الیکشن کمیشن کو فریق بنایا گیا۔

توہین عدالت کی درخواست میں موقف اختیار کیا گیا کہ عدالتی احکامات کے باوجود الیکشن کمیشن نے ابھی تک پی ٹی آئی کا سرٹیفیکٹ ویب سائٹ پر جاری نہیں کیا، الیکشن کمیشن عدالتی فیصلے سے باخبر ہے، اسکے باوجود شائع نہیں کیا۔

دائر درخواست میں کہا گیا کہ عدالت کے واضع احکامات کے باوجود فریقین پی ٹی آئی کے عام انتخابات کی راہ میں رکاوٹ پیدا کر رہے ہیں۔

درخواست میں استدعا کی گئی کہ الیکشن کمیشن کا یہ اقدام توہین عدالت کے زمرے میں آتا ہے، ان کے خلاف کارروائی کی جائے۔

واضح رہے کہ الیکشن کمیشن آف پاکستان نے پی ٹی آئی انٹرا پارٹی انتخابات اور انتخابی نشان سے متعلق پشاور ہائی کورٹ کا فیصلہ سپریم کورٹ میں چیلنج کرنے کا فیصلہ کرلیا ہے۔

الیکشن کمیشن نے پشاور ہائی کورٹ کے فیصلے کو چیلنج کرتے ہوئے قانونی ٹیم کو فیصلے کے خلاف اپیل تیار کرنے کی ہدایت کر دی۔

گزشتہ روز پشاورہائی کورٹ نے تحریک انصاف کے حق میں فیصلہ سنایا تھا، پی ٹی آئی کی درخواست منظور کرتے ہوئے الیکشن کمیشن کو سرٹیفیکٹ جاری کرنے کا حکم دے دیا گیا تھا۔

پشاورہائی کورٹ نے پی ٹی آئی انٹراپارٹی انتخابات اورانتخابی نشان واپسی کیخلاف کیس کی سماعت کا فیصلہ محفوظ کیا تھا۔ عدالت نے الیکشن کمیشن کا نوٹیفکیشن معطل کرتے ہوئے پی ٹی آئی کا انتخابی نشان بلا بحال کردیا تھا۔

بعدازاں 22 دسمبر کو الیکشن کمیشن نے پی ٹی آئی انٹرا پارٹی انتخابات کالعدم قرار دیا تھا۔