خیبرپختونخوا کے گورنر حاجی غلام علی نے کہا ہے کہ پشاور میں امن و امان کی صورتحال خراب ہے، اس حالت میں الیکشن ایک بڑا چیلنج ہے۔

تفصیلات کے مطابق خیبرپختونخوا کے گورنر حاجی غلام علی نے بول نیوز سے خصوصی  گفتگو کرتے ہوئے کہا کہ سینیٹ میں الیکشن کے التواء کے حوالے سے قرارداد اہمیت کی حامل ہے، سینیٹ ایوان بالا ہے جس کی اپنی اہمیت ہے، سینیٹرز نے انتخابات میں مشکلات کے تناظر میں قرارداد پیش کی اور اکثریت سے قرارداد پاس کی۔

غلام علی نے کہا کہ سینیٹ میں الیکشن کے حوالے سے قرارداد ایک سفارش ہے، الیکشن کمیشن ان سفارشات میں کتنا وزن دیکھتی ہے اب یہ دیکھنا ہے، پشاور میں امن و امان کی صورتحال خراب ہے، الیکشن کے التواء کی قرارداد سینیٹرز کی جانب سے ایک ریکوئسٹ ہے، اب ان سفارشات اور ریکوئسٹ پر عملدرآمد کرنا اور نہ کرنا الیکشن کمیشن کا اختیار ہے، آئین کا تقاضا ہے کہ ملک میں عام انتخابات ہوں۔

ان کا کہنا تھا کہ منتخب حکومت سے ملک میں سیاسی اور معاشی استحکام آسکتا ہے، عام انتخابات ملک کے لئے ناگزیر ہیں، جو جماعتیں لیول پلینگ فیلڈ نہ ہونے کی باتیں کر رہی ہیں سب زیادہ وہی جماعتیں اجتماعات کر رہی ہیں، سیاسی اجتماع کے لیے ڈی سی اپروول ضروری ہے تاکہ سیکیورٹی فراہم کی جائے، سڑکوں پر سیاسی اجتماعات نہیں ہونے چاہیے جس سے دوسرے لوگوں کو تکلیف ہو، سب قانون کی بالادستی پر یقین رکھتے ہیں۔