اسلام آباد: اسپیکر قومی اسمبلی راجہ پرویز اشرف نے کہا ہے کہ کوئی بھی جماعت سیاسی گولڈن نمبر لے سکتی ہے تو ٹھیک ورنہ مخلوط حکومت بنے گی۔

پیپلز پارٹی کے سینئر رہنما راجہ پرویز اشرف نے پریس کانفرنس سے خطاب کرتے ہوئے کہا کہ راجہ نوید بھٹی نے میری حمایت کا اعلان کیا ہے، میں ان کا مشکور ہوں انہوں نے میری حمایت کی ہے۔

انہوں نے کہا کہ مجھے امید ہے پیپلز پارٹی بہت بہتر رزلٹ دے گی، پیپلز پارٹی پنجاب میں اس بار سرپرائز دے گی، خطہ پوٹھوہار میں ہم نے جو اپنے امیداوار کھڑے کیے ہیں وہ بہت بہتر حالت میں ہیں، پنجاب میں جب سے چیئرمین صاحب نے کیمپیئن کی ہے امیدوار بنے ہیں۔

راجہ پرویز اشرف نے کہا کہ پیپلزپارٹی اس بار بہت بہتر اپنی الیکشن مہم چلا رہی ہے نتائج بہت بہتر ہونگے، الیکشن سب نے اپنا اپنا لڑنا ہے، گولڈن نمبرز آئیں تو حکومت اپنی بنتی ہے اور اگر گولڈن نمبرز نہ آئیں تو اتحاد کی حکومت بنتی ہے۔

انکا کہنا تھا کہ پاکستان پیپلز پارٹی ایک تجربہ کار پارٹی ہے، سب کو ساتھ لے کر چلتے ہیں، ہم نے پہلے بھی. لوگوں کی قوت خرید بڑھانے کے لیے لوگوں کی تنخواہیں بڑھائیں، بینظیر انکم سپورٹ پروگرام دیا۔

پیپلز پارٹی کے سینئر رہنما نے مزید کہا کہ آصف علی زرداری ملک کے بہترین سیاستدان ہیں لوگوں کو ان کے بارے میں غلط فہمیاں ہیں، انہوں نے مشکل حالات میں بھی اچھا پرفارم کیا ہے۔