سابق وزیر اعظم شاہد خاقان عباسی نے کہا ہے کہ ن لیگ کی سیاست سے اتقاق نہیں کرتا۔

شاہد خاقان عباسی نے میڈیا سے گفتگو کرتے ہوئے کہا کہ میں الیکشن نہیں لڑرہا، الیکشن سے پہلے کبھی پولیس بلارہی ہے، کبھی نیب تو کبھی اینٹی کرپشن۔

انہوں نے کہا کہ الیکشن کا عمل غیر متنازع ہونا چاہیے اور نظر بھی آنا چاہیے، الیکشن مقدس عمل ہے اسے متنازع بنانے سے ملک کا نقصان ہوگا۔

سابق وزیر اعظم کا کہنا تھا کہ اس سیاست سے اتفاق نہیں کرتا جہاں آج ن لیگ کھڑی ہے، ہر گزرتے دن کے ساتھ مطمئن ہوتا ہوں میرا فیصلہ درست تھا۔

شاہد خاقان عباسی نے مزید کہا کہ ن لیگ سے کوئی ناراضگی نہیں ہے، ٹکٹ کے لئے اپلائی نہیں کیا، نواز شریف نے وطن واپسی پر مجھ سے کوئی رابطہ نہیں کیا۔

اس سے قبل اپنے ایک بیان میں شاہد خاقان عباسی نے کہا تھا کہ عام انتخابات کے ذریعے کوئی بہتری نہیں آئے گی، عام انتخابات میں نئے سے نئے چہرے تو سامنے آتے ہیں لیکن کوئی تبدیلی نہیں آتی۔

سابق وزیراعظم نے کہا تھا کہ جس طرح نوازشریف اقتدار میں آ رہے ہیں، مجھے اس سے اختلاف ہے، ن لیگ کے ساتھ ہوں ان کے خلاف الیکشن نہیں لڑوں گا، سیاست ابھی نہیں چھوڑی، پاکستان میں کرسی کی کوئی طاقت نہیں ہوتی، میں وزیر اعظم نہیں تھا بلکہ مجھے ملازمت دی گئی۔

 شاہد خاقان عباسی نے سابق چیئرمین پی ٹی آئی کی ناکامی کی وجہ چوری کا الیکشن قرار دیتے ہوئے کہا کہ لیڈر وہ ہوتا ہے جس کے کہنے پرعوام ووٹ ڈالیں۔