اسلام آباد: صدر مملکت ڈاکٹر عارف علوی نے وفاقی محتسب کے فیصلے کے خلاف آئیسکو کی درخواست پر فیصلہ سنادیا۔

تفصیلات کے مطابق صدر عارف علوی نے آئیسکو کو بجلی کنکشن تنصیب میں تاخیر پر شکایت کنندہ کو 139,000 روپے واپس کرنے کی ہدایت کردی۔

حاجی اختر رحیم نے ٹرانسفارمر اور بجلی کنکشن کیلئے آئیسکو کو درخواست دی تھی، شکایت کنندہ کو متعلقہ سامان کی قیمت  سمیت 305,656 روپے کا ڈیمانڈ نوٹس جاری کیا گیا، شہری نے رقم جمع کرائی، بروقت کنکشن لگانے کے بجائے قیمت میں اضافے کی وجہ سے اضافی ڈیمانڈ نوٹس جاری کر دیا گیا۔

شہری نے ڈیمانڈ نوٹس واپس لینے کے لیے آئیسکو سے رجوع کیا مگر ریلیف نہ دیا گیا، شہری نے شکایت کے ازالے کیلئے وفاقی محتسب سے رابطہ کیا، جس نے شہری کے حق میں فیصلہ دیا۔

آئیسکو نے محتسب کے فیصلے کے خلاف صدر مملکت کے پاس درخواست دائر کی، کیس کی ذاتی سماعت ریکارڈ دیکھنے کے بعد صدر مملکت نے آئیسکو کو رقم واپسی کی ہدایت کی۔

صدر مملکت نے کہا کہ آئیسکو نے اپنے کنزیومر سروس مینول کی خلاف ورزی کی، ایک بار ڈیمانڈ نوٹس کی مکمل ادائیگی کے بعد قیمت بڑھنے کی وجہ سے مزید کوئی چارجز/ڈیمانڈ نوٹس نہیں دیا جا سکتا۔

عارف علوی نے مزید کہا کہ آئیسکو 30 دن میں کنکشن لگانے کا پابند اور تنصیب میں 7 ماہ کی تاخیر ہوئی، وفاقی محتسب کا فیصلہ درست دلائل پر مبنی، قانونی طورپر پائیدار ہے۔

صدر مملکت نے آئیسکو کی نمائندگی مسترد کرتے ہوئے وفاقی محتسب کے فیصلے کو برقرار رکھا۔