سکھر: پاکستان پیپلز پارٹی کے مرکزی رہنما سید خورشید شاہ نے کہا ہے کہ الیکشن ملتوی نہیں ہونے چاہیے اس سے ملک کو بڑا نقصان پہنچ سکتا ہے۔

سابق وفاقی وزیر سید خورشید شاہ نے بول نیوز سے خصوصی گفتگو کرتے ہوئے کہا کہ ملک میں الیکشن ہونے چاہیے الیکشن نہ ہوئے تو بڑا نقصان ہوسکتا ہے، الیکشن ملتوی ہوئے تو یہ ملک سے دشمنی ہوگی۔

انہوں نے کہا کہ جو لوگ الیکشن ملتوی کرانا چاہتے ہیں وہ جانتے ہیں کہ ہر حال میں الیکشن تو ہوئے ہیں، گرمی ہو، سردی ہو الیکشن ہوتے رہے ہیں، بے نظیر بھٹو کی شہادت سے بڑی دہشت گردی ہوسکتی ہے لیکن تب بھی الیکشن ہوئے۔

پی پی رہنما نے کہا کہ پولنگ اسٹیشنز پر فوج تعینات ہونی چاہیے، صاف اور شفاف الیکشن کے لیے ہمارے اداروں کو کھڑا ہونا چاہیے، کچھ قبائلی علاقے ایسے ہیں جہاں فوج نہ ہونے سے پولنگ کا عمل متاثر ہوسکتا ہے۔

انکا کہنا تھا کہ کچھ علاقوں میں تو پولنگ اسٹیشنوں پر قبضے ہو جاتے ہیں، پولنگ اسٹیشنز پر ہمارے چند فوج جوان بھی موجود ہوں گے تو الیکشن بہتر انداز میں ہوسکیں گے۔

خورشید شاہ نے کہا کہ ایم کیو ایم آٹھ مرتبہ مختلف حکومتوں میں رہی ہے، انکی سوچ یہ ہی ہے کہ آئندہ جو حکومت آئے گی اس کے ساتھ چلے جائیں گے۔

انہوں نے مزید کہا کہ وہ پیپلزپارٹی کے ساتھ بھی حکومت میں آنے کو تیار رہتے ہیں اور پیپلز پارٹی بھی ان کو ساتھ لے لیتی ہے کیونکہ ہم مثبت سیاست کرتے ہیں۔