پیپلزپارٹی کے سینٹرل الیکشن مانیٹرنگ سیل کے انچارج سینیٹر تاج حیدر نے چیف الیکشن کمشنر کو خط لکھا جس میں انہوں نے این اے 73 ڈسکہ میں غیر قانونی زیر حراست تین کارکنوں کی فوری رہائی پر زور دیا۔

خط کے متن میں کہا گیا کہ ہم تشویش کے ساتھ اطلاع دیتے ہیں کہ این اے 73 ڈسکہ سیراں والی سے ہمارے تین بے گناہ کارکنوں کا پولیس نے اٹھا لیا ہے، تین بے گناہ کارکنان رانا گلزار، رانا بہادر علی اور رانا احسان کو گزشتہ رات بغیر کسی وجہ کے تھانہ ستراہ نے اٹھایا۔

تاج حیدر نے خط میں لکھا کہ کارکن پی پی کے الیکشن سیل میں بیٹھے کوئی تھے، پولیس وردی میں ملبوس اہلکار ہمارے الیکشن آفس میں داخل ہوئے اور ہمارے فرنیچر اور دیگر سامان کو بڑے پیمانے پر نقصان پہنچایا۔

خط کے متن کے مطابق ہمارے امیدوار رانا محمود اشرف صبح 4 بجے تک اس تھانے میں ان کی رہائی کی کوشش کرتے رہے، ڈی ایس پی ڈسکہ مسٹر سعادت نے صاف صاف کہا کہ ان کے پاس اوپر سے آرڈر ہیں اور ہم کچھ نہ کر سکتے۔

خط میں کہا گیا کہ ڈی پی او سیالکوٹ حسن اقبال کا بھی یہی رویہ تھا، پولیس کھلے عام پی ایم ایل این کے امیدوار کی حمایت کر رہی ہے، ہمارے کارکنوں اور ہمدردوں کو ہراساں کیا جارہا ہے، پولیس کی جانب سے اس طرح ہراساں کرنے سے امن و امان کی صورتحال پیدا ہوسکتی ہے۔

تاج حیدر نے چیف الیکشن کمشنر کو بتایا کہ پی پی پی پی نے شام کو سری والی میں جلسہ عام کا انعقاد کرنا ہے، آپ سے استدعا ہے کہ فوری مداخلت کریں اور حکم دیں کہ پی پی پی پی کے بے گناہ کارکنوں کو فوری رہا کیا جائے۔