عام انتخابات میں مسلم لیگ (ق) پاکستان مسلم لیگ (ن) کی سیٹ ایڈجسٹمنٹ پر ناراض ہو گئی ہے۔

تفصیلات کے مطابق عام انتخابات میں مسلم لیگ ن اور ق لیگ کے درمیان سیٹ ایڈجسٹمنٹ کے معاملے پر سابق وزیراعظم و صدر پاکستان مسلم لیگ چوہدری شجاعت حسین کی زیر صدارت اہم ہنگامی اجلاس منعقد ہوا جس میں ق لیگ نے مسلم لیگ ن کی سیٹ ایڈجسٹمنٹ پر ناراضگی کا اظہار کیا۔

اجلاس میں ق لیگ نے کہا کہ پاکستان مسلم لیگ نے ہمیشہ پاکستان اور پاکستانی عوام کی ترقی اور خوشحالی کے لیے اپنا کردار ادا کیا ہے اور کرتے رہیں گے صرف اپنی ذات کی حد تک سیٹ ایڈجسٹمنٹ قبول نہیں۔

مسلم لیگ (ق) نے کہا کہ ہمارے دیگر امیدواروں کے مقابلے میں ن لیگ نے اپنے امیدواروں کو ٹکٹ جاری کر دیے ہیں، پارٹی کے قائد اور دیگر رہنماؤں نے فیصلہ کیا ہے کہ ہم اپنے امیدواروں کو دوہرے معیار کی نظر نہیں ہونے دیں گے۔

ق لیگ کا کہنا ہے کہ ن لیگ سے سیٹ ایڈجسٹمنٹ نہیں کریں گے، ہم بنا سیٹ ایڈجسٹمنٹ کے مقابلے کے لیے تیار ہیں۔

سابق وفاقی وزیر و سینئر نائب صدر پاکستان مسلم لیگ چوہدری سالک حسین نے مزید کہا کہ ن لیگ گجرات سے بھی میرے اور میرے بھائی چوہدری شافع حسین کے خلاف اپنے نامزد کردہ امیدواروں کو ٹکٹ جاری کردیں۔

ق لیگ نے مزید کہا کہ ہم نے جن امیدواروں سے عہد کیا کہ وہ ہمارے ساتھ ہیں اور اگر ن لیگ انکا مقابلہ کرے گی تو ہم بھی اپنے ساتھیوں کے ساتھ اسی صف میں کھڑے ہونے کو ترجیح دیں گے۔