سکھر: پیپلز پارٹی کے رہنما سید ناصر حسین شاہ نے عام انتخابات 2024 سے متعلق بڑا دعویٰ کردیا۔

پیپلز پارٹی کے رہنما سید ناصر حسین شاہ کا کہنا ہے کہ پی پی کی مثبت سیاست سے ایم کیو ایم کو نقصان پہنچا ہے جب کہ پیپلز پارٹی نے اپنے دورِ اقتدار میں سندھ کے عوام کی بلاتفریق خدمت کی ہے۔

انہوں نے کہا کہ سندھ بہتر ہوا ہے اور صوبے میں ترقی ہوئی ہے جب کہ انفراسٹرکچر بھی بہتر ہوا ہے، پی پی نے سندھ کے عوام کی خدمت کی ہے اور یہی وجہ ہے کہ کراچی کا میئر جیالا ہے۔

ان کا کہنا تھا کہ سندھ بھر میں جتنی کارپوریشنز ہیں اس میں جیالے میئرز ہیں، صوبے میں جتنی ڈسٹرکٹ کونسلیں ہیں اور ٹاونز ہیں ان کے چیئرمین جیالے ہیں۔

پیپلز پارٹی کے رہنما کہتے ہیں کہ یہ نقصان ایم کیو ایم کا ہوا ہے اور یہ تمام عہدے پی پی کے پاس ہیں جب کہ یہ پی پی پر عوام کا اعتماد ہے۔

سید ناصر حسین شاہ کا کہنا تھا کہ کراچی سے دھونس، دھاندلی، بوری بند لاشوں کی سیاست کو ہم نے ختم کیا ہے، آج بوری بند لاشیں نہیں ملتیں، بھتہ کلچر ہم نے ختم کیا ہے۔ وہ جو پولنگ اسٹیشنز کو یرغمال بنا لیا جاتا تھا وہ سلسلہ بند کیا گیا ہے۔

انہوں نے مزید کہا کہ ہمیں ایم کیو ایم کہیں نظر نہیں آرہی اور ہم پہلی مرتبہ سندھ میں کلین سوئپ کررہے ہیں، نہ صرف دیہی بلکہ شہری علاقوں میں بھی۔ کراچی کی 22 میں سے 15 نشستوں پر تو ہم مکمل پُر اعتماد ہیں۔