ملک کے مختلف علاقوں میں دھند کا راج برقرار ہے اور موٹر ویز کے متعدد سیکشنز کو شدید دھند کے باعث عارضی طور پر بند کردیا گیا ہے، جس کے باعث مسافروں کو شدید مشکلات کا سامنا ہے۔

نیشنل ہائی ویز اینڈ موٹروے پولیس کے مطابق موٹروے ایم 1 شدید دھند کے باعث پشاور سے اسلام آباد تک جبکہ سوات ایکسپریس وے کرنل شیر خان سے اسماعیلہ تک اور ایم 2 اسلام آباد سے بلکسر، ایم 14 ہکلہ سے ٹھٹی کلراں انٹر چینج تک ہر قسم کے ٹریفک کے لیے بند کر دی گئی ہے۔

اس کے علاوہ موٹروے ایم-1 مین اسلام آباد ٹول پلازہ سے برہان تک، ایم-1 صوابی سے برہان، ایم-2 مین ٹول پلازہ اسلام آباد سے بلقسر انٹر چینج، ایم-5 شیر شاہ سے ظاہر پیر، ایم-5 اقبال آباد سے روہڑی اور ایم-5 کو بھی پنو عاقل انٹر چینج تا روہڑی تک بند کر دیا گیا ہے۔

ترجمان موٹروے پولیس کا کہنا ہے کہ موٹروے بند کرنے کا مقصد حادثات سے بچاؤ اور موٹروے استعمال کرنے والوں کی جان و مال کی حفاظت ہے۔

ترجمان نے کہا کہ شہریوں سے درخواست ہے کہ دھند کے اوقات میں غیر ضروری سفر سے گریز کریں، اپنا سفر دن کی روشنی میں مکمل کر کے دھند کے آغاز سے پہلے اپنے منزل مقصود تک پہنچ جائیں، گاڑیوں میں فوگ لائٹس کا استعمال کریں، تیز رفتاری سے پرہیز کریں اور اگلی گاڑی سے مناسب فاصلہ معمول سے زیادہ رکھیں۔

ترجمان موٹروے پولیس نے مزید کہا کہ سفر شروع کرنے سے پہلے موٹروے پولیس ہیلپ لائن 130 سے معلومات حاصل کی جا سکتی ہیں، اس کے علاوہ نیشنل ہائی ویز اینڈ موٹروے پولیس کے آفیشل سوشل میڈیا اکاؤنٹ سے بھی تازہ ترین معلومات حاصل کی جا سکتی ہیں۔