لاہور: عوامی نیشنل پارٹی (اے این پی) نے پنجاب میں استحکام پاکستان پارٹی (آئی پی پی) کے امیدواروں کی حمایت کا بڑا فیصلہ کرلیا ہے۔

اے این پی پنجاب کے جنرل سیکریٹری امیر بہادر خان کی صدر آئی پی عبدالعلیم خان سے ملاقات ہوئی، اس دوران امیر بہادر خان نے گفتگو کرتے ہوئے کہا کہ پنجاب بھر میں عبدالعلیم خان اور اُن کے پینل کا بھرپور ساتھ دیں گے۔

ہزارہ ویلفیئر ایسوسی ایشن کے چیئرمین بشیر احمد نے بھی عبدالعلیم خان سے ملاقات میں حمایت کا اعلان کیا جبکہ تحریک انصاف راوی ٹاؤن کے سابق صدر مبشر لال نے بھی آئی پی پی میں شمولیت کا اعلان کرتے ہوئے کہا کہ این اے117میں پی ٹی آئی کے تمام کارکن عبدالعلیم خان کی انتخابی مہم چلائیں گے۔

علاوہ ازیں عارف اعوان ایڈووکیٹ، نعیم گورائیہ ایڈووکیٹ نے بھی وکلاء برادری کے ہمراہ عبدالعلیم خان سے ملاقات کی اور کہا کہ این اے117 سے وکلاء عبدالعلیم خان کا بھرپور ساتھ دیں گے۔

امیدوار قومی اسمبلی عبدالعلیم خان کا کہنا تھا کہ میرا منشور عام آدمی کے کام آنا اور بلا تفریق خدمت یقینی بنانا ہے، شاہدرہ اور مضافاتی علاقوں کو ہر لحاظ سے اپ گریڈ کرنا ہماری اولین ترجیح ہوگی۔

عبدالعلیم خان نے مزید کہا کہ عام انتخابات میں اے این پی اور ہزارہ برادری کے ساتھ دینے پر شکریہ ادا کرتا ہوں، پی ٹی آئی کے کارکنوں کی حوصلہ افزائی ہوگی، جائز مقام دیں گے، باعث مسرت ہے کہ وکلاء برادری این اے 117 میں ہمارے ساتھ چلے گی۔