ملک بھر میں عام انتخابات میں محض ایک دن باقی ہے تاہم جس کے پیش نظر پولنگ عملے کو انتخابی سامان کی ترسیل شروع کر دی گئی۔

کل ہونے والے انتخابات کے لیے ریجنل دفاتر سے بیلٹ باکسز اور دیگر سامان ریٹرننگ آفیسرز کے حوالے کیا جا رہا ہے، تاہم مطلوبہ سامان کے حصول کے بعد عملہ بیلٹ باکسز کو پولنگ اسٹیشنز تک پہنچائے گا۔

الیکشن کمیشن کے ضابطہ اخلاق کے مطابق تمام پولنگ اسٹیشنز پر پریزنٹنگ افسران کو عمل درآمد کی ہدایات جاری کی گئی ہیں۔

انتخابی مہم کا وقت ختم

گزشتہ روز عام انتخابات 2024 کیلئے انتخابی مہم کا وقت ختم ہو گیا تھا جس کے بعد الیکشن کمیشن نے انتخابی ضابطہ اخلاق جاری کیا تھا۔

الیکشن کمیشن کے اعلامیہ کے مطابق شق 48 اور 49 کے تحت انتخابی مہم 6 اور 7 فروری کی درمیانی شب ختم ہوئی، انتخابی مہم کا مقررہ وقت گزرنے کے بعد انتخابی مہم چلانے پر مکمل پابندی ہو گی، مقررہ مدت ختم ہونے کے بعد انتخابی تشہیر کی بھی اجازت نہیں ہوگی۔

ترجمان الیکشن کمیشن کے مطابق پولنگ ڈے پر بھی انتخابی مہم یا ووٹرز کی حوصلہ افزائی یا حوصلہ شکنی کرنے کی اجازت نہیں ہو گی، انتخابی عمل تک میڈیا پر ہر قسم کے پول سروے پر بھی پابندی ہو گی، میڈیا پولنگ ختم ہونے کے ایک گھنٹے بعد رزلٹ نشر کرسکے گا۔

واضح طور پر بتانا ہوگا کہ نتائج غیر حتمی اور غیر سرکاری ہیں، آر اوز پولنگ سٹیشنوں کا مکمل غیر حتمی نتیجہ جاری کریں گے، ڈسٹرکٹ اینڈ ریٹرنگ افسران و پولیس ضابطہ اخلاق پر عملدرآمد کی پابند ہے، ضابطہ اخلاق کی خلاف ورزی غیر قانونی تصور ہو گی۔

الیکشن کمیشن کے اعلامیے میں مزید بتایا گیا کہ مانیٹرنگ ٹیمیں فعال ہو گئیں جو ضابطہ اخلاق کی خلاف ورزی کرنے والوں کیخلاف کارروائی کریں گی، کل 8 فروری کو پولنگ کا عمل صبح 8 سے شام 5 بجے تک جاری رہے گا، پولنگ کے انتظامات مکمل کر لیے گئے ہیں۔