پاکستان تحریک انصاف (پی ٹی آئی) کے رہنما بیرسٹر گوہر خان کا کہنا ہےکہ اس مرتبہ ففتھ جنریشن والی دھاندلی ہوئی ہے۔

قومی اسمبلی کے افتتاحی اجلاس سے قبل پارلیمنٹ ہاؤس کے باہر میڈیا سے غیر رسمی گفتگو کرتے ہوئے بیرسٹر گوہر خان نے کہاکہ  کسی کا مینڈیٹ چوری کر کے پارلیمان میں نہیں آنا چاہیے۔

پی ٹی آئی رہنما نے مزید کہاکہ ففتھ جنریشن والی دھاندلی ہوئی ہے، اصل مقصد تو یہ ہے کہ پارلیمان مضبوط ہو، ایوان مقدس جگہ ہے ، ایوان میں وہ لوگ بیٹھ سکتے ہیں جو حقیقی نمائندے ہوتے ہیں ، جس کے پاس پبلک مینڈیٹ نہیں ان کو ایوان میں بیٹھے کا کوئی حق نہیں۔

واضح رہےکہ قومی اسمبلی کے افتتاحی اجلاس میں نومنتخب ارکان نے حلف اٹھا لیا ہے۔

 قومی اسمبلی کا اجلاس 1 گھنٹے سے زائد کی تاخیر سے شروع ہوا ہے، اجلاس کا آغاز تلاوتِ قرآن پاک سے ہوا جس کے بعد نعتِ رسولِ مقبول پیش کی گئی۔

قومی اسمبلی کے اجلاس کی صدارت اسپیکر راجہ پرویز اشرف کر رہے ہیں ، انہوں نے نومنتخب ارکان سےحلف لیا ، جس کے بعد تمام ارکان رجسٹرپردستخط کر رہے ہیں۔

ذرائع کے مطابق موجودہ قومی اسمبلی ایوان 336 ارکان پرمشتمل ہے۔

اجلاس کے اختتام پر اسپیکر راجہ پرویز اشرف کی جانب سے قومی اسمبلی کے نئے اسپیکر اور ڈپٹی اسپیکر الیکشن کے شیڈول کا اعلان کرنے کے بعد کارروائی کو ملتوی کر دیا جائے گا۔

واضح رہے کہ الیکشن 2024ء کے بعد نئی قانون ساز اسمبلی کی تشکیل کے لیے صدر مملکت نے قومی اسمبلی کا اجلاس آج طلب کیا ہے۔