پاکستان مسلم لیگ (ن) کی چیف آرگنائزر مریم نواز نے پنجاب کی حکومت سنبھالنے کے لیے تیاریاں شروع کردی ہیں۔

مسلم لیگ (ن) کی نامزد کردہ وزیراعلیٰ پنجاب مریم نواز پنجاب کی باگ ڈور سنبھالنے کیلئے تیار ہیں، صوبائی حکومت کیسے چلائیں گی؟ اس حوالے سے مریم نواز نے سرکاری محکموں سے بریفنگ لینا شروع کردی ہے۔

مریم نواز سب سے پہلے چیف سیکریٹری سے ملیں، اس کے بعد سیکریٹری صحت علی جان نے بھی بریفنگ دی۔

جمعے کو سیکریٹری سی این ڈبلیو، سیکریٹری ایکسائز اور محکمہ تعلیم کے سیکریٹریوں نے نامزد وزیراعلیٰ کو بریف کیا۔

اس کے علاوہ مریم نواز کو آج مزید محکموں کے سیکریٹری بریفنگ دیں گے جس کے بعد نئی حکومت کیلئے ورکنگ پالیسی سازی کی جائے گی۔

واضح رہے کہ پنجاب اسمبلی کے منتخب ارکان کی کامیابی کے نوٹیفکیشن کے بعد اسمبلی کا اجلاس بلایا جائے گا جو 29 فروری سے قبل لازمی ہونا ہے، اس کے بعد مریم نواز کو باضابطہ وزیراعلیٰ منتخب کیا جائے گا۔

بعدازاں نئی حکومت آنے کے ساتھ ہی پنجاب کی بیوروکریسی میں بھی بڑے پیمانے پر اکھاڑ پچھاڑ کا امکان ہے۔