اسلام آباد: صدر مملکت ڈاکٹر عارف علوی نے میریکل سالٹ ورکس اور پاکستان منرل ڈیولیپمنٹ کارپوریشن کے درمیان معاہدے پر دستخط کو خوش آئند قرار دے دیا۔

صدر مملکت عارف علوی سے نمک اور معدنیات کے شعبے کی امریکی کمپنی کے وفد کی ملاقات ہوئی جس میں وفد نے صدر کو نمک کی کان کنی، پراسیسنگ اور مارکیٹنگ میں کمپنی کے کردار کے بارے میں بریفنگ  دی۔

دوران ملاقات صدر عارف علوی نے گفتگو کرتے ہوئے کہا کہ پاکستان اپنی معاشی صورتحال بہتر بنانے کیلئے برآمدات بڑھانے پر توجہ مرکوز کررہا ہے، پاکستان غیرملکی کمپنیوں کےساتھ باہمی طور پر فائدہ مند کاروباری شراکت داری چاہتا ہے۔

انہوں نے کہا کہ پاکستان مختلف شعبوں میں بیرونی سرمایہ کاری اور جوائنٹ وینچرز کے فروغ کا خواہاں ہے، پاکستانی نمک کی بہتر پراسیسنگ، پیکجنگ اور مارکیٹنگ سے قدر میں اضافہ کیا جاسکتا ہے۔

عارف علوی نے کہا کہ پاکستانی نمک اعلیٰ معیار اور انتہائی کم سرمایہ کاری سے حاصل کیا جاسکتا ہے، حکومتی سرمایہ کاروں کو سہولیات پہنچانے کیلئے پرعزم ہے، عالمی سطح پر پاکستانی نمک کی مانگ میں اضافے کیلئے اعلیٰ معیار کے نمک کی فراہمی کو

صدر مملکت نے مریکل سالٹ ورکس کمپنی کو پاکستان میں سرمایہ کاری کرنے پر سراہا اور میریکل سالٹ ورکس اور پاکستان منرل ڈیولیپمنٹ کارپوریشن کے درمیان معاہدے پر دستخط کو بھی خوش آئند قرار دیا۔

دوسری جانب وفد نے صدر مملکت کو زرِ مبادلہ کمانے میں پاکستانی نمک کی کانوں کی صلاحیت کے بارے میں بتایا اور کہا کہ معیاری اور منرلز سے بھرپور راک سالٹ دنیا میں صرف پاکستان میں پایا جاتا ہے، پاکستانی نمک کم قیمت اور اعلیٰ معیار کا حامل ہے۔

وفد کا کہنا تھا کہ پاکستان دنیا میں نمک کی بڑی مارکیٹ سے استفادہ کر سکتا ہے، معدنیاتی اجزاء کے لحاظ سے پاکستانی نمک کا معیار دنیا میں سب سے بہترین ہے۔

انہوں نے مزید کہا کہ ذمہ دارانہ کان کنی، بہتر پراسیسنگ اور مارکیٹنگ سے پاکستانی نمک کی قدر میں اضافہ کیا جاسکتا ہے، میریکل سالٹ ورکس کلیکٹو پاکستان میں نمک کے شعبے میں سرمایہ کرے گی، کمپنی پاکستانی نمک کی اعلیٰ معیار کی ٹیکنالوجی کی مدد سے کان کنی اور پراسیسنگ کرے گی اور اعلیٰ معیار کی ٹیکنالوجی کی بدولت کان کنی اور پراسیسنگ کے دوران نمک کے ضیاع کو کم کیا جا سکے گا۔

مزید برآں ملاقات میں صدر مملکت نے ماحول دوست اور ذمہ دار کان کنی کے فروغ کی ضرورت پر بھی زور دیا۔