پاکستان اور ایران میں کشیدگی کے معاملے پر ایران کے اعلیٰ سطح وفد نے دورہ پاکستان کے لئے تیاریاں شروع کردی ہیں، تاہم رواں برس پاکستان اور ایران کے درمیان اعلیٰ سطح کے وفود کے کئی تبادلے ہوں گے۔

سفارتی ذرائع کے مطابق نئی حکومت کے بننے کے بعد ایران کا اعلیٰ سطح وفد پاکستان کا دورہ کرے گا، اس حوالے سے ایرانی وفد کی دورہ پاکستان کے لئے دونوں ممالک میں ورکنگ جاری ہے، پاکستان اور ایران کے اعلیٰ حکام باہمی معاہدوں پر کام کر رہے ہیں۔

ذرائع نے بتایا کہ پاک ایران اعلیٰ سطح کے وفود کے تبادلے پاکستان میں نئی حکومت کے قیام کے بمکمل ہونے کے بعد ہوں گے، وسط اپریل کے بعد پہلا اعلیٰ سطح کا بڑا ایرانی وفد اسلام آباد پہنچے گا، وفد 20 سے 25 افراد پر مشتعمل ہو گا جس میں ایران کے سینئر وزرا بھی شامل ہوں گے۔

سفارتی ذرائع کا کہنا ہے کہ وفد پاکستان میں باہمی تجارت، سرمایہ کاری، دفاع، سیکیورٹی اور توانائی کے حوالے سے متعدد مفاہمتی یاداشتوں و معاہدوں پر داستخط کرے گا۔

علاوہ ازیں وفد ایران پاکستان گیس پائپ لائن، ایران سے پاکستان کو توانائی کی فراہمی اور سرحدی سیکیورٹی کے حوالے سے اہم بات چیت کرے گا اورایران کے صدر کے دورہ پاکستان کے حوالے سے معاملات طے کرے گا۔

سفارتی ذرائع نے مزید بتایا کہ اوائل جون میں ایران کے صدر سید ابراہیم رئیسی کا دورہ پاکستان متوقع ہے، ایرانی صدر اعلیٰ پاکستانی سیاسی و عسکری قیادت سے ملاقاتیں کریں گے جبکہ نومبر کے آخر میں بھی ایک ایرانی وفد کی پاکستان آمد متوقع ہے۔