سابق وزیر خارجہ و چیئرمین پاکستان پیپلز پارٹی بلاول بھٹو زرداری کا کہنا ہے کہ بیروزگار نوجوانوں کو بینظیر یوتھ کارڈ دیں گے۔

سابق وزیر خارجہ و چیئرمین پاکستان پیپلز پارٹی بلاول بھٹو زرداری نے چھاچھرو میں جلسے سے خطاب کرتے ہوئے کہا ہے کہ تھرپارکر اور چھاچھرو کے عوام نے آج اپنا فیصلہ سنا دیا ہے۔

انہوں نے کہا کہ الیکشن 8 فروری کو ہونے جا رہے ہیں، ایک شخص چوتھی بار اس ملک پر مسلط ہونے کی کوشش کر رہا ہے، اگر آپ تیر پر مہر لگائیں تو دنیا کی کوئی طاقت میرا راستہ نہیں روک سکتی۔

بلاول بھٹو زرداری نے کہا کہ دوسرے یہاں، وہاں دیکھ رہے ہیں، میں پاکستان کے عوام سے ووٹ مانگ رہا ہوں، مہنگائی،غربت اور بیروزگاری عوام کے سب سے بڑے مسائل ہیں۔

سابق وزیر خارجہ نے کہا کہ پاکستان کے عوام کیلئے 30 لاکھ  پکے گھر بنا کر دوں گا، وعدہ ہے مجھے وفاقی حکومت ملتی ہے تو آمدنی میں دگنا اضافہ کروں گا۔

انہوں نے کہا کہ تھرپارکر سے کراچی تک ٹرین کا بندوبست کریں گے، عوام کوئی ایسی سازش کو کامیاب نہیں ہونے دیں گے، وہ چاہتے ہیں ان کے کٹھ پتلی کراچی میں بیٹھ کر آپکے حقوق پر ڈاکا مارسکیں۔

بلاول بھٹو زرداری نے کہا کہ میاں صاحب کی یہ کوشش ہے جیسے سندھ میں پچھلے الیکشن ہوئے، اگر وہ کارونجھر تک ہاتھ بڑھاتے ہیں تو ہم وہ ہاتھ کاٹیں گے۔

 سابق وزیر خارجہ نے کہا کہ پہلے ہم نے سڑکیں بنائی پھر اسلام کوٹ میں ایئرپورٹ بنایا، 8 فروری کے بعد اس منصوبے پر مزید کام ہوگا، پی پی نے یہاں روزگار کے لئے منصوبہ شروع کیا تھا۔

   انہوں نے کہا کہ وہ شخص کہتا ہے کہ تھرکول کا منصوبہ اس نے شروع کیا، میں نے اپنے ہاتھوں سے10 نکاتی ایجنڈا تیار کیا ہے، سرکاری اسکولوں میں پڑھنے والے بچوں کے لیے کھانے کا انتظام کریں گے۔

بلاول بھٹو زرداری نے کہا کہ ہر ضلع میں اسپتال بنائیں گے، بھوک مٹاؤ پروگرام شروع کریں گے، بیروزگار نوجوانوں کو بینظیر یوتھ کارڈ دیں گے، حکومت ملی تو بینظیر ہاری کارڈ کسانوں کو دوں گا۔

 چیئرمین پاکستان پیپلز پارٹی نے کہا کہ ملک کی خواتین کی ویسی خدمت کرنا چاہتا ہوں جیسے بیٹا ماں کی کرتا ہے، میاں صاحب3بار وزیراعظم رہے لیکن انہوں نے سندھ میں کام نہیں کیا۔

انہوں نے کہا کہ آپ نے ان لوگوں کو شکست دینی ہے، ستارے صرف رات میں اچھے لگتے ہیں، یہ لوگ آپ کا ووٹ لیکر رائیونڈ اور لاہور کی خدمت کریں گے۔

 سابق وزیر خارجہ نے کہا کہ پیپلزپارٹی انتقام کی سیاست پر یقین نہیں رکھتی، باقی جماعتیں نفرت اور تقسیم کی سیاست کررہی ہیں۔