اسلام آباد: وزیر اطلاعات و نشریات مرتضٰی سولنگی نے کہا ہے کہ  حکومت سازی کے عمل کو مکمل کرنے کیلئے 29 فروری تک کا وقت ہے۔

نگران وفاقی وزیر مرتضٰی سولنگی نے بول نیوز سے گفتگو کرتے ہوئے کہا کہ آئین میں دیے گئے وقت میں حکومت نہ بنے تو پھر آئین ہی اس کا فیصلہ کرے گا۔

انہوں نے کہا کہ ہمارا آئین جامع اور مفصل ہے ہر صورتحال سے نکلنے کا راستہ موجود ہے۔

مرتضٰی سولنگی نے کہا کہ حکومت سازی کے عمل کو مکمل کرنے کیلئے 29 فروری تک کا وقت ہے، میرے خیال میں کوئی تعطل اور ڈیڈ لاک نہیں ہے۔

نگران وزیر اطلاعات نے کہا کہ یہ معمول کی کارروائی ہے اور منقسم پارلیمان ہے، کسی جماعت کے پاس سادہ اکثریت نہیں ہے۔

مرتضٰی سولنگی نے مزید کہا کہ ایکس کی بندش کے معاملے کا سوال وزیر آئی ٹی سے پوچھیں۔

گزشتہ روز مرتضیٰ سولنگی نے اپنے ایک بیان میں کہا تھا کہ نگران حکومت نے عام انتخابات کروا کر اپنی ذمہ داری پوری کر دی ہے، الیکشن کمیشن کی جانب سے منتخب امیدواروں کی فہرست جاری ہونے کے بعد وزارت پارلیمانی امور قومی اسمبلی کا اجلاس بلانے کی سمری بھجوائے گی۔

انہوں نے مزید کہا تھا کہ صدر مملکت سے وزارت پارلیمانی امور قومی اسمبلی کا اجلاس طلب کرنے کی درخواست کی جائے گی، ہمیں اپنے اداروں اور نظام پر اعتماد کرنا چاہیے۔