لاہور: آئی جی پنجاب ڈاکٹر عثمان انور نے کہا ہے کہ ملک دشمن و شر پسند عناصر کو روکنے کیلئے بارڈر چیک پوسٹوں پر سخت نگرانی کا عمل جاری ہے۔

الیکشن 2024ء کے پر امن انعقاد کیلئے پنجاب پولیس کی تیاریاں مکمل ہیں، تاہم اس حوالے سے آئی جی پنجاب نے اپنے جاری کردہ بیان میں کہا کہ لاہور سمیت تمام اضلاع میں پولیس ٹیمیں آج ڈیوٹی پوائنٹس سنبھال لیں گی۔

انہوں نے کہا کہ پنجاب پولیس کے 01 لاکھ 30 ہزار سے زائد افسران و اہلکار الیکشن سیکیورٹی پر تعینات ہیں اور انتخابی عمل کی مانیٹرنگ کیلئے 32 ہزار سے زائد سی سی ٹی وی کیمروں کی تنصیب کا کام مکمل ہوگیا ہے۔

آئی جی پنجاب نے کہا کہ الیکشن کمیشن کے ضابطہ اخلاق پر من و عن عمل در آمد یقینی بنایا جا رہا ہے، انتخابی ضابطہ اخلاق، دفعہ 144، اسلحہ کی خلاف ورزی پر ذمہ داران کے خلاف بلا تفریق کارروائیاں جاری ہیں۔

انکا کہنا تھا کہ پولنگ اسٹیشنز پر ہوائی فائرنگ، لڑائی جھگڑے اور انتخابی عمل کو سبوتاژ پر بلا تفریق کارروائی ہوگی، 5577 انتہائی حساس پولنگ اسٹیشنز پر اضافی نفری، ڈولفن فورس اور کوئیک رسپانس سمیت دیگر ٹیمیں تعینات ہونگی۔

عثمان انور نے مزید کہا کہ ملک دشمن و شر پسند عناصر کو روکنے کیلئے بارڈر چیک پوسٹوں پر سخت نگرانی کا عمل جاری ہے، پولیس افسران سیکیورٹی ایجنسیز، آرمڈ فورسز، ضلعی انتظامیہ سمیت تمام اداروں کے ساتھ مکمل رابطے میں ہیں جبکہ صوبائی، ریجنل، ڈویژنل اور سی پی او کنٹرول رومز سے سیکیورٹی انتظامات کی کلوز مانیٹرنگ کی جاری ہے۔