مسلم لیگ (ن) کے رہنما رانا ثناء اللہ نے کہا ہے کہ قوم اعتبار کرے، ہم منہگائی کے عذاب کو ٹالیں گے۔

سابق وزیر داخلہ رانا ثناء اللہ نے فیصل آباد میں نیوز کانفرنس کرتے ہوئے کہا کہ مسلم لیگ ن کے امیدواروں کی حمایت پر مرکزی علماء کونسل کی قیادت کا مشکور ہوں، یقین دلاتے ہیں تحفظ ناموس رسالت، تحفظ ختم نبوت کو اپنے ایمان کا حصہ سمجھتے ہیں۔

انہوں نے کہا کہ اب صرف 2 دن رہ گئے ہیں جن میں 2 ماہ کا کام کرنا ہے اور لوگوں تک پیغام پہنچانا ہے، پاکستان اس وقت بہت مشکل حالات سے دو چار ہے، 2017 میں پاکستان ترقی کے ٹریک پر تھا سازش کے تحت پاکستان کو پیچھے کی طرف دھکیلا گیا۔

رانا ثناء اللہ نے کہا کہ اس وقت ڈالر کی قدر کم پیٹرول اور چینی سستی اور عام آدمی کی زندگی آسان تھی، اس وقت منہگائی کا سامنا ہے جس پر قابو پالیا جایے تو ملک آگے بڑھ سکتا ہے۔

لیگی رہنما نے کہا کہ مسلم لیگ ن اور نواز شریف سے وعدہ کیا ہے، قوم اعتبار کرے منہگائی کے عذاب کو ٹالیں گے، قوم اس لئے اعتبار کرے کیونکہ اس سے قبل دہشت گردی اور لوڈشیڈنگ پر قابو پایا، منہگائی دہشت گردی سے بڑا چیلنج نہیں ہے۔

رانا ثناء اللہ نے مزید کہا کہ 8 فروری کے بعد مسلم لیگ ن مرکز اور صوبے میں حکومت بنائے گی، ترقی کا سفر دوبارہ شروع ہو گا۔