اسلام آباد: نگران وزیر اعظم انوارالحق کاکڑ نے کہا ہے کہ کھیل مختلف ملکوں میں رابطوں کا ذریعہ ہے۔

انوارالحق کاکڑ نے اسکولوں کیلئے پرائم منسٹرز مائنڈ اسپورٹس اینشی ایٹو کی افتتاحی تقریب سے خطاب کرتے ہوئے کہا کہ پاکستان کے ہر اسکول کو مائنڈ اسپورٹس تک رسائی حاصل ہوگی۔

انہوں نے کہا کہ دنیا بھر میں کھلاڑیوں نے مختلف شعبوں میں نمایاں کام کیا، نوجوانوں کی ذہنی صلاحیتوں کو بڑھانے کے لئے کھیلوں کا فروغ ضروری ہے۔

اس موقع پر انوار الحق کاکڑ نے مائنڈ اسپورٹس کے اقدام کو فروغ دینے اور اس کی وکالت کرنے کے پختہ عزم کا بھی اظہار کیا۔

نگران وزیراعظم نے کہا کہ ہم ایک عالمی برادری ہیں اور اسے زیادہ سے زیادہ ہم آہنگی اور تعاون کی ضرورت ہے۔

 انہوں نے مزید کہا کہ کھیل اس طرح کے تعاون کو فروغ دینے میں ایک اہم سرگرمی ہے، اس طرح کی سرگرمیاں لوگوں کو نظم و ضبط کی طرف لے جاتی ہیں جس سے وہ اچھے سائنسدان، انجینئر، سیاستدان اور بیوروکریٹس بنتے ہیں۔

دوسری جانب بین الصوبائی رابطہ کے وزیر فواد حسن فواد نے کہا کہ مائنڈ اسپورٹس کے اقدام کو پاکستان کے تمام سرکاری سکولوں تک پھیلایا جائے گا۔

انہوں نے پرائیویٹ سیکٹر کے اسکولوں کو بھی دعوت دی کہ وہ اپنے آپ کو مائنڈ اسپورٹس سے آراستہ کریں۔

فواد حسن فواد نے مزید کہا کہ ہمیں پہلے مہینے میں وفاقی دارالحکومت کے علاقے میں ایک سو اسکولوں کو مائنڈ اسپورٹس سے آراستہ کرنے کا ہدف حاصل کرنا ہوگا، تاہم انہوں نے یقین ظاہر کیا کہ یہ تعداد تیزی سے بڑھے گی کیونکہ صوبے بھی اس میں شامل ہوں گے۔