پاکستان بھر میں عام انتخابات 2024 کے لیے پولنگ کے عمل کا آغاز ہوگیا ہے۔

ملک بھر میں پولنگ کا عمل بغیر کسی وقفے کے صبح 8 بجے سے شام 5 بجے تک جاری رہے گا۔

قومی اور چاروں صوبائی اسمبلیوں کے 855 حلقوں کیلئے 12 کروڑ 79 لاکھ سے زیادہ رجسٹرڈ ووٹرز اپنا حق رائے دہی استعمال کریں گے۔

ان انتخابات میں ملک کی انتخابی تاریخ میں سب سے زیادہ امیدوار حصہ لے رہے ہیں جن کی تعداد 17 ہزار سے زائد ہے جن میں 11 ہزار سے زائد آزاد امیدوار ہیں۔

اس سال انتخابات میں سرگودھا کے قصبہ للیانی میں پہلی مرتبہ خواتین کو ووٹ کاسٹ کرنے کی اجازت مل گئی ہے۔

ذرائع کے مطابق اس علاقے میں سال 2013 اور 2018 میں خواتین کو ووٹ کاسٹ کرنے نہیں دیا گیا تھا، ماضی میں پنچائیت نے خواتین کو ووٹ دینے سے روک دیا تھا۔

آج تحصیل کوٹ مومن کے قصبہ للیانی میں خواتین این اے 83 اور پی پی 73 میں ووٹ کاسٹ کررہی ہیں۔

عام انتخابات کے موقع پر ملک بھر میں موبائل فون سروس عارضی طور پر معطل کردی گئی۔

وزارت داخلہ کی جانب سے جاری بیان میں کہا گیا کہ موبائل فون سروس کو دہشتگردی کے واقعات کے پیش نظر کیا گیا۔

وزارت داخلہ کا کہنا ہے کہ دہشتگردی کے واقعات میں قیمتی جانوں کا ضیاع ہوا۔امن و امان قائم رکھنے کے لیے حفاظتی اقدامات ضروری ہیں۔

موبائل فون سروس معطل ہونے سے شہریوں کو شدید مشکلات سامنا ہے۔

الیکشن کمیشن کی 8300 کی موبائل فون سروس بھی متاثر ہوئی ہے جس سے ووٹرز پولنگ اسٹیشن کی معلومات حاصل کرنے سے محروم ہیں۔